Fylkesutvalet i Hordaland har samrøystes godkjent at Meland kommune får løyve til å forskottere 6,5 millionar kroner til bygging av gang- og sykkelveg langs riksveg 564 på strekninga Fløksand-Orrhøyen.
Fylkesutvalet har vedteke at refusjonstidspunktet blir fastsett i samband med handsaming av handlingsprogrammet for Nasjonal Transportplan for 2010-2019. Forskotteringa blir refundert utan renter og kompensasjon for prisauke.
Meland kommune har søkt om løyve til å forskottere 6,5 millionar kroner til bygging av 1800 meter gang- og sykkelveg på strekninga Fløksand-Orrhøyen. Den låge kostnaden ved prosjektet er eit resultat av at gang- og sykkelvegen blir bygd samstundes med at det blir lagt grøfter for framføring av straum og vatn til det nye næringsområdet på Orrhøyen. Frank Mohn AS som byggjer ny fabrikk i dette næringsområdet, står for forskotteringa.