Hordaland fylkesutval meiner det er viktig at fylkeskommunen engasjerer seg systematisk i folkehelsearbeidet i Hordaland og at fylkeskommunen tek på seg å leia eit partnarskap som arbeida for å fremja folkehelsa.
Folkehelse er eit tverrsektorielt fagfelt som m.a. femner om ernæring, fysisk aktivitet, førebyggande helsevern og anna tilrettelegging. Hordaland har stor aktivitet på feltet, i fylkeskommunen, hjå Fylkesmannen, regionale og frivillige organisasjonar og i kommunane, heiter det i saksutgreiinga.
I utgreiinga vert det også påpeika at det vil vera ein føremon om arbeidet vert koordinert betre, for å skapa synergieffektar og utnytta ressursane meir optimalt. Ei styrking av samarbeidet og betre samordning kan også gjera det lettare å trekkja inn nye relevante fagfelt og sjå satsinga i høve til det regionale utviklingsarbeidet elles. Fylkeskommunen har eit ansvar som regionalt samordnar og utviklingsaktør.
Fylkesrådmannen meiner det er ønskjeleg å styrkja og systematisera satsinga på arbeidet med folkehelse. I første omgang bør dette skje gjennom omfordeling og omorganisering av eksisterande administrative ressursar. Fylkesrådmannen vil likevel understreke at ei større satsing på dette feltet kan gjere det nødvendig med nye ressursar.
Fylkesutvalet ber om at det vert teke initiativ til ein strategikonferanse som skal munna ut i ein handlingsplan for folkehelsa.
Stanley Hauge 28.04.2006 08:00