Endeleg kom nyhenda som mange har venta på. Etter lang tid med fleire politiske dragkampar kan vi no glede oss over at regjeringa legg fram ei positiv innstilling til Stortinget om bygging av Hardangerbrua. Eg er svært takksam for at regjeringa no opnar o
Etter at Arbeidarpartiet har snudd i denne saka er fylkesordføraren trygg på at også Stortinget til slutt stiller seg bak Hardangerbrua. Hardangerbrua er eit viktig og nødvendig prosjekt. Brua vil skape grunnlag for nye og betre kommunikasjonar, optimisme og vekst i denne delen av Hordaland som i dag slit med nedgang i befolkninga og stagnasjon i deler av næringslivet, understrekar ein oppglødd fylkesordførar.
Regjeringa si positive innstilling til Hardangerbrua er også godt nytt for bergensarane. Med dette prosjektet vil vi få ein ny ferjefri og raskare veg mellom landets to største byar, konstaterer fylkesordføraren. Dette prosjektet på nærare to milliardar kroner er eit lokalt spleiselag utan sidestykke. Gjennom kommunale tilskot, bompengeinntekter og fylkeskommunale midlar sit staten att med ein svært liten del av rekninga. I tillegg vert staten kvitt ein elles evigvarande utgiftspost til ferjedrifta mellom Bruravik og Brimnes, påpeikar Selsvold Nyborg.
På vegne av fylkestinget takkar fylkesordføraren alle bruforkjemparane som har stått på og aldri gitt opp trua på dette prosjektet. I tillegg sender og fylkesordføraren helsingar til motkreftene som har vist stort engasjement og kreativitet i arbeidet med denne saka.
Tida er no inne for å leggje ned stridsøksene og sjå fram til at Hardanger og Hordaland får på plass eit svært etterlengta samferdselsprosjekt, seier fylkesordførar Torill Selsvold Nyborg.