På konferansen deltok mellom anna Peggy Zachariassen, Samferdselsdepartementet (f.v), Ove Ronny Leganger i Vestlandske Blindeforbund, Guro Fjellanger, medlem av Syseutvalget som la fram handlingsplanen til regjeringa for universiell utforming, Dagmar Reutz Hillestad, sekretær for Fylkesrådet for funksjonshemma, Gudrun Mathisen, prosjektleiar for den nye fylkesdelplanen, og Urzula Weber som arbeider med universell utforming i Kvam kommune. (foto: Bjarte Brask Eriksen)
Grunnlaget for ny fylkesdelplan
På konferansen på Hotell Norge i Bergen vart grunnlaget for den nye fylkesdelplanen lagt. Deltakarar var mellom anna brukarorganisasjonar, politikarar og offentlege etatar. Fylkesutvalet 23. og 24. november skal vedta forslag til planutkast og sende det ut på høyring i tre månader. I mars neste år skal fylkestinget vedta den endelege planen.
Stort satsingsområde
Gudrun Mathisen la vekt på at universell utforming, slik at alle utan omsyn til funksjonshemming, skal kunne bruke offentlege tilbod, er eit stort satsingsområde både nasjonalt og lokalt. Regjeringa har lagt fram handlingsplan for universell utforming og eiga lov er vedteke for å få ei meir effektiv bygningsrådgiving.
Hordaland er og langt framme med å integrere alle typar elevar i skulen. Målet må vere å gjere alle elevar i stand til å delta i arbeidslivet.
- Vi skal ha endringar på grunn av den nye planen og føreslå konkrete tiltak, understrekte Gudrun Mathisen.
Krenking
Urzula Weber i Kvam herad meiner det er ei krenking å bli fråteke menneskeretter grunna funksjonshemming.
- Vi vil ha betre livskvalitet for funksjonshemma. Dei har rett til å delta i eit inkluderande samfunn, sa Weber.
13.500 blinde og svaksynte i Hordaland
Ove Ronny Leganger i Vestlandske Blindeforbund opplyste at 800.000 nordmenn har ein eller annan form for funksjonshemming.
- I Hordaland har vi 13.500 blinde og svaksynte. Ikkje alle har tilgang til det offentlege rom. Dei blir utestengde frå aktivitetar og fellesskap. Universell utforming vil gje tilgang for alle. Vi får betre integrasjon. Det blir mindre ekstrakostnader og færre spesialløysingar. Det gjev god samfunnsøkonomi og berekraftig utvikling, sa Leganger.