– Vi er svært glade for at regjeringa endeleg legg fram Stortingsproposisjonen om Hardangerbrua og går inn for at brua skal byggjast og stå ferdig i 2011, seier fungerande fylkesordførar Tom-Christer Nilsen.
– Vi reknar med at den påtroppande regjeringa vil følgja opp saka og at ho vert behandla i Stortinget i løpet av hausten. Inntil Stortinget har gjort endeleg vedtak i tråd med regjeringa si innstilling, er det viktig at vi i Hordaland held fram arbeidet for å få byggjestart snarast mogleg, seier fung. fylkesordførar Nilsen, og legg til:
Langvarig innsats
– Det er eit langvarig og stort engasjementet både i kommunane som soknar til Hardangerbrua, i næringslivet og i heile fylket elles, som har ført til regjeringa sitt ja i denne saka
Viktig for utvikklinga
Hardangerbrua er viktig for å gje indre delar av Hordaland ny vekst gjennom betre kommunikasjonar.
Brua er eit godt og viktig prosjekt for sambandet vest-aust, og det same for sambandet mellom store delar av Hordaland og Sør-Austlandet og Sørlandet (nord-sør-sambandet).
Fungerande fylkesordførar Nilsen trekkjer fram at finansieringa av brua i stor grad skal skje ved lokal innsats i form av tilskot frå kommunar, Hordaland fylkeskommune (konsesjonskraftmidlar) og bompengebetaling. Statlege tilskot vil vera relativt beskjedne.
– Vi ser no fram til å kunna konsentrera krefter og innsats om byggjinga av brua og leggja til rette for at dei indre delane av Hordaland i tillegg til betre samband får ein «brueffekt» både når det gjeld næringsutvikling og folketal, seier fung. fylkesordførar Nilsen.
Spørjande
— Vi har merka oss at regjeringa seier det kan verta aktuelt å forlengja bompengeperioden for å delfinansiera eventuelle miljøtunnelar på Hardangervidda. På sparket er vi spørjande til dette, seier fungerande fylkesordførar Tom-Christer Nilsen.