Fiskeflåten i Hordaland leverer i stor grad fangsten sin i andre fylke. Fangstverdien av fisk fanga av Hordalandsbåtar var 1 578 mill. kr, medan ilandført fangst i Hordaland berre var på 368 mill. kr. Dette går fram av statistikkheftet «Hordaland i tal»
I «Hordaland i tal» kan ein og lesa at Bergen, den største, og Modalen, den minste kommunen i Hordaland, har éin ting felles: Talet på arbeidsplassar i kommunen er større enn talet på arbeidstakarar som er busette i kommunen. Elles kan ein mellom anna lese at det er 900 færre tilsette i statleg administrasjon i Hordaland i 2004 enn i 2000.
Berre seks «industrikommunar»
Haustutgåva av «Hordaland i tal» inneheld m.a. oversikter over utdanningsnivå og forsking og utvikling (FoU), utviklinga i talet på bedrifter i regionane, sysselsettingsutvikling etter næring i fylket og næringsstruktur i 2004 i kommunane. Av næringsstrukturoversiktene går det m.a. fram at no kan berre seks kommunar i fylket kallast «industrikommunar», dersom definisjonen på dette er at industrinæringane, inkl. bygg og anlegg, er største næringsgruppe målt i talet på arbeidsplassar.
Meir opplysningar finn du i pdf-fila av «Hordaland i tal»
Sjå og internettsidene til «Hordaland i tal»