På konferansen på Radisson SAS Norge i Bergen deltok stortingsrepresentantar frå Hordaland, fylkesutvalsmedlemer, ordførarar i Hordalandskommunar, fylkesmannen og samarbeidspartnarar innan næringsliv, forsking og utdanning m.fl.
2005 skal verta året då Hordaland viser at vi verkeleg jobbar i lag, var fylkesordføraren si oppmoding i opningstalen. Selsvold Nyborg trekte fram at i 2004 greidde Hordaland å stå samla og spela på lag når det galdt Nasjonal transportplan. Alle var med – kommunar, næringsliv, organisasjonane og fylket, og vi fekk aksept for våre prioriteringar. Til slutt gjord stortingsrepresentantane våre ei bragd og fekk saka gjennom i Stortinget.
— No må vi vera på plass og syta for at økonomien i prosjekta tikkar inn på rett tidspunkt i fylgje NTPs framdriftsplan. Dette vert nye tak der vi treng kvarandre. Det er slik vi må jobba framover, i team, eller partnarskap som det heiter i dag. For framleis gjeld det gamle visdomsordet at ”samhald gjer sterk”! understreka fylkesordføraren.
Hordaland i dag
Det går stort sett godt i Hordaland. Vi bidreg solid til nasjonens inntekter og verdiskaping – og det skal vi gjera. Eg trur faktisk vi kan bidra endå meir – dersom vi får høve til å utløyse meir av verdiskapingspotensialet i Hordaland. Skal vi klara det, trengst det verkemiddel som treffer rett i forhold til vår situasjon – innan samferdsel, næringspolitikk, forsking og utdanning, distrikts- og regionalpolitikken, fiskeri, landbruk og reiseliv. Det er ikkje alltid meir pengar vi ber om – men å få rett og høve til sjølv å innretta verkemidlane i forhold til våre behov, sa fylkesordførar Selsvold Nyborg.
Sentralisering og avpolitisering
Mange hevdar med tyngde at vi er inne i ein periode prega av sentralisering, avpolitisering og auka statsstyring. Den store maktutgreiinga frå 2003 fortel at det kommunale sjølvstyret er kraftig svekka. Kommunane er først og fremst blitt eit reiskap for statleg politikk, og sit igjen med verkeleg råderett berre over mindre reint lokale saker. Ja, heile folkestyret er under forvitring, skriv maktforskarane, sa Selsvold Nyborg og la til: — I denne situasjonen er det viktig at vi står saman i fylket - på tvers av tradisjonelle båsar og skiljeliner mellom offentleg sektor, næringslivet og ulike institusjonar.
Bergen som drivkraft
Storbyen Bergen er ei viktig drivkraft for utviklinga i fylket vårt – og på Vestlandet. Eg brukar å seia at Bergen er er eit av Hordaland sine største fortrinn. Bergen har store ressursar – og fyller sentrale funksjonar for omlandet og resten av fylket. Dette gjeld både innan offentleg verksemd, utdanning og forsking, helsesektoren, kulturlivet, handel og service – og kommunikasjonar. Nesten 2/3 av alle arbeidsplassane i fylket er i Bergen, trekte fylkesordføraren fram.
Fylkessordføraren slo fast at i eit verdiskapingsperspektiv betyr Bergen sine finans- og kompetansemiljø mykje, og Bergen er den marine hovudstaden i Norge, definitivt!. Også det maritime næringsmiljøet i Bergen er tungt og viktig.
Samarbeid Bergen, omland og fylke
Men når det gjeld kontakten mellom Bergen og resten av fylket, syner ei undersøking ved SNF at økonomiske og sosiale band mellom næringslivet i byen og i resten av fylket er relativt svake. Det er ei viktig utfordring å betre på dette. Derfor gler det meg mykje at byrådet i Bergen tar slike utfordringar på alvor, og no viser stor interesse for å utvikle samhandlinga mellom byen og resten av fylket. Fylkeskommunen blir gjerne med i dette arbeidet! sa fylkesordførar Selsvold Nyborg.
Bustadprisar og eigedomsselskap
Fylkesordføraren viste til at bustadprisane i Bergen har auka sterkt dei siste ti åra. Kvadratmeterprisen på blokkhusvære er nesten firdobla (frå 7000 kr til 26 000 kr) og for einebustader er den om lag tredobla (frå 5400 kr til 17 000 kr).
Det er derfor ikkje rart kanskje at mange vel å plassera kapitalen sin i eigedom heller enn i nye bedrifter. Men eigentleg er dette eit problem vi skal ta på alvor. For mykje av den kapitalen næringslivet treng for å skape nye bedrifter, blir låst fast i eigedom.
Nokre av eigedomsselskapa tilbyr god infrastruktur og tenester til nyetableringar. Det er bra. Men dersom kapital fastlåst i eigedomsselskap fører til at spennande nyetableringar må gi opp på grunn av mangel på risikovillig kapital – så har vi eit problem. For det er nemleg slik at Hordaland med sine mange forskings- og kompetansemiljø i særleg grad treng kapital som kan gjere det muleg å realisere spennande nyskapande bedrifter.
Derfor er eg glad for at vi no får eit nytt Såkornfond – og eg vonar det planlagte Techstart-fondet også lar seg realisera.
Les heile talen til fylkesordførar Torill Selsvold Nyborg
Stanley Hauge