Elevane ved estetisk allmennfag ved Årstad videregående skole har gjort det igjen: Gått heilt til topps i konkurransen om å illustrere Skolekatalogen til Hordaland fylkeskommune. 24. januar overrekte inntaksleiar Nils Skavhellen premien, ein sjekk på 7.50
Vinnarane er dei 13 elevane i B-klassen på grunnkurs i estetisk allmennfag, klasse 1 EstA B. Dette er andre året Hordaland fylkeskommune har konkurranse om illustrasjonane til Skolekatalogen og i fjor var det og klasse 1 EstA B som vann. Dei går no 2. året og har gjort seg bemerka i fleire internasjonale konkurransar.
Rektor imponert
Ved premieutdelinga deltok rektor Bente Lis Larsen, utviklingsleiar Aud Åse Kvamme og
avdelingsleiar Anne Helene Skogland. Rektor sa at ho var imponert, og avdelingsleiar at ho var stolt av klassen.
Inntaksleiar Nils Skavhellen i Hordaland fylkeskommune overrekte sjekken på 7.500 kroner til klassekontakt Hildegunn Apalseth på vegner av klassen.
Merkevare
Skavhellen sa at det kom inn mange gode forslag, men juryen (inntaksleiaren og Jo Gjerstad i Bodoni Hus) landa på forslag i same stil som vinnarane i fjor.
- Vi held på å byggje opp ein merkevare, sa Skavhellen.
- Det var hard konkurranse. Skolar frå heile Hordaland deltok. Vi fekk mange gode forslag, sa Gjerstad.
Éin katalog blir to
Tidlegare har det kome ut éin skolekatalog til kvart skoleår. I år blir det to: Først ein søkjarkatalog i januar og så ein inntakskatalog i mai. Søkjarkatalogen inneheld oversikt over alle skular, linjer og fag med søknadsfrist 1. mars. Inntakskatalogen i mai skal vise alle prosedyrar i samband med sjølve inntaket med alle spørsmål og svar.
Det er tre premiar i samband med Skolekatalogen. 2500 kroner går til førstesida på søkjarkatalogen, 2500 kroner går til førstesida på Inntakskatalogen og 2500 kroner til vignettane i katalogane. Alle desse tre premiane går altså til same klasse.
Pengane skal brukast til studietur i 3. klasse.
Sjå bilete av vinnarane
Bjarte Brask Eriksen