Frå Haugesund i sør til Finnmark i nord
Italienarane skal vitje utvalde stader langs norskekysten frå Haugesund i sør til Finnmark i nord. Dette er leiarar innan Slow Food International, ei internasjonal rørsle som arbeider for å fremje god matkultur og det sakte, gode livet, ein slags motkultur til ”fast food”.
Gjere ”slow food” meir kjent
Det er fleire formål med reisa, mellom anna å førebu godkjenning av moglege norske produkt innan fiskerisektoren i Slow Food-rørsla, samt utvikle samarbeid kring matkultur og gjere Slow Food meir kjend i Noreg. Dessutan deltek representantar frå Genova by, italiensk reiseliv og media som vil sjå om det er mogeleg å få til samarbeid kring reiseliv mellom landa, og lage reise– og opplevingsreportasjar om Noreg i Italia og Italia i Noreg.
Internasjonal godkjenning
Slow Food ønskjer å inkludere tradisjonell tørrfisk-, klippfisk-, silde- og tønneproduksjon som eigne internasjonale Slow Food-produkt. Slik internasjonal godkjenning opnar opp for god hjelp til dei aktuelle bedriftene mellom anna til marknadsføring og profilering, teknisk hjelp, eksport og reiseliv. Rørsla opnar og for drøftingar om eit fiskevær kan bli utvikla og godkjent som Slow Food-presidiumprosjekt – ”Slow Fish village”.
Reise langs kysten
Dei italienske gjestene kjem til Bergen måndag 28. februar og skal gjennomføre ei reise for både å kartlegge og for å få meir informasjon om norsk konvensjonell fiskeindustri. Dette skal danne grunnlag for godkjenning som Slow Food-produkt og auke konkret samarbeid mellom utvalde fiskeindustribedrifter og den italienske kvalitetsmarknaden for viktige norske matkulturprodukt.
Fiskevær i Finnmark
Turen går frå Bergen, via bøkkarmiljøa våre i Samnanger/Fusa og vidare til Haugesund og sildetradisjonane. Så med Hurtigruta frå Bergen og nordover til Sunnmøre med røykjesildtradisjonane og vidare til Kristiansund og klippfisken. Derifrå skal dei vidare med fly til Troms og Sørvær i Finnmark der dei mellom anna vil sjå nærare på tørrfiskproduksjon og reiselivsopplevingar.
Felles satsing
Tiltaket er utvikla i fellesskap mellom Innovasjon Noreg i Milano, Hordaland fylkeskommune, medlemsbedrifter i varemerkeforeininga Norsk Tradisjonsfisk, og lokale og regionale styresmakter, reiselivsorganisasjonar og næringsaktørar langs heile reiseruta.
Detaljert program
Deltakarliste
Kva er Slow Food og lenkjer til meir informasjon
Bjarte Brask Eriksen