Fylkesutvalet går inn for at Hordaland fylkeskommune skal delta i eit prosjekt knytt til opplæring i entreprenørskap ved Mbala High School i Zambia, og rår fylkestinget til å vedta dette.
Sotra vidaregåande skule har i tre år hatt samarbeid med denne vidaregåande skulen i Zambia. Prosjektet starta for tre år sidan då lærar Annbjørg Kolltveit ved Sotra vidaregåande skule var i Zambia og såg tilhøva ved skulen. Etter dette har pengane innsamla ved Operasjon Dagsverk på Sotra gått til skulen i Zambia. Sist haust var den innsamla summen heile 215.000 kroner. No er samarbeidet kome opp på ministernivå både i Noreg og Zambia, og FN sin organisasjon for utdanning, UNESCO, er involvert. Også Eid vidaregåande skule og Sogn og Fjordane fylkeskommune er med.
Fylkesutvalet rår til å godkjenna at kontaktane som er etablerte, vert følgde opp. Fylkestinget tek avgjerd i saka 9. mars.
Stanley Hauge