Fylkesordførar Torill Selsvold Nyborg delte ut oppfinnarprisen til Egil Bru Overaa for eit system som overvaker lasting mellom skip og rigg. (Foto: Stanley Hauge)
Oppfinninga gjev støtte til kranoperatørane og vil gjera lasteoperasjonane både enklare og sikrare ved at den automatisk korrigerer kranen sine innstillingar og koordinerer operatøren si styring i høve til fartøya sine rørsler, heiter det i juryen si grunngjeving.
Oppfinninga tilfredsstiller alle krava til oppfinnarprisen for Hordaland. Ideen har god oppfinnarhøgd og nyhendeverdi, og oppfinnaren har dokumentert både vilje og evne til å realisera oppfinninga, som er venta å ha eit stort forretningspotensial i nasjonale og internasjonale marknader.
HEIDERLEG OMTALE
Juryen har gjeve heiderleg omtale til to andre oppfinningar, Tore Eide for system som overvaker lastsikringa ved godstransport på mange transportmiddel, og Torbjørn Aasen for vaskerobot for oppdrettskar.
Tore Eide, frå Søreide, har utvikla eit system som overvaker lastsikringa ved transport av gods på mange typar lastberarar. Systemet kan avverje farlege situasjonar
og ulykker som følgje av last som losnar eller forskyv seg under transport.
Av omsyn til patenteringsprosessen han no er inne i, kan det ikkje no avslørast meir om detaljane rundt oppfinninga, men juryen understrekar at om oppfinninga får kommersiell suksess vil det bety auka effektivitet og reduserte kostnader for ei viktig næring her i fylket. Oppfinninga har samstundes ein global marknad.
Torbjørn Aasen, frå Nesttun, har utvikla ein vaskerobot for oppdrettskar. I oppdrettskara byggjer det seg opp eit tjukt lag av feitt og skit frå fisken. I dag vert kara jamleg tømte og skittlaget vert skrapa vekk med handkraft. Å kjøre vaskeroboten eit par gonger i veka, hindrar at det uønska belegget veks til. Dette er ei positiv utvikling for ei viktig næring for Hordaland og marknaden for produktet er global.
28 kandidatar
Hordaland fylkeskommune har delt ut Oppfinnarprisen for Hordaland sidan 1993, og i år var det 28 kandidatar som meldte si oppfinning på i konkurransen. Søknadene hadde jamt over eit høgt nivå og fleire av dei var vinnarkandidatar.
Juryen har vore sett saman av følgjande medlemmer:
Hans Otto Robberstad – Hordaland fylkeskommune
Kåre Spissøy og Stian Davidsen – Innovasjon Norge
Jan Olav Ormberg – Bergen Patentkontor,
Atle Våge – Høgskolen i Bergen,
Vigdis Ravnøy – LO Hordaland,
Svein Hatlem – NHO Hordaland