I 2004 formidla fagopplæringskontoret i alt 1059 lærekontraktar. Lærekontraktar vert inngått heile året, men hovudmengda av kontraktar vert formidla i perioden frå mai til utgangen av august.
Om det er bedriftene som i år er tidlegare ute, eller om det er uttrykk for ein generell auke når vi alt no har formidla om lag like mange lærekontraktar som i heile fjor, er for tidleg å fastslå. Men at vi alt i første halvdel av august har fått på plass så mange læreplassar, er ei positiv utvikling, seier fagopplæringssjef Ole G. Fredheim.
Ledig i nokre fag, manglar plassar i andre
I enkelte fag er det ikkje nok søkjarar i forhold til behovet, det gjeld til dømes malarfaget, stillasbyggjarfaget og innan betongfaga. For dei som er interesserte og kvalifiserte til læreplass i desse faga, er det berre å melda seg snarast, seier fagopplæringssjef Fredheim.
På den andre sida er det i nokre fag mange fleire søkjarar enn det kan skaffast læreplassar til. Det gjeld innan elektrikarfaget, kokkefaget og bilfaget lette køyretøy.
— Eg oppmodar firma i desse bransjane til å tenkja langsiktig på rekrutteringa og ta inn lærlingar. Ta kontakt med fagopplæringskontoret snarast. Det er mange velkvalifiserte unge som er klar for utdanning og arbeidsinnsats i dei nemnde faga, seier fagopplæringssjefen.
For dei som ikkje får læreplass er det aktuelt å oppretta sluttopplæring (VK II – vidaregåande kurs II) i skulen. Slike klassar vil eventuelt verta oppretta i nokre fag i september/oktober, når fylkeskommunen har oversikt over kor mange som står utan tilbod.