I utstillinga Havlandet møter du alle versjonar av havet, det snille, milde havet; sommerferiar og myggstikk, reker og kvitvin, lukta av varm ferjekø og båtis, vasskrekk og sjøsjuke. Havet som ei pulsåre, næringsgjevande, pulserande. Havet som bringar varer og menneske mellom det kjende og det ukjende.
Det løyndomsfulle havet
Havlandet skal handle om det evige havet og om draumar som er blitt verkelege, om vanvittige idear, som å hente opp olje og gass frå havets botn. Om det løyndomsfulle havet som pirrar fantasien og forskartrongen. Og om det urolege havet, det farlege havet som tek liv. Utstillinga skal handle om Draugen og Jesus og andre strategiar menneska brukar for å overleve i møtet med naturkreftene. Og om strategiar for framtida. Kjem det hai i Hardangerfjorden? Blir Karmøy det nye Ibiza?
Fleire utstillingar
Havlandet er ei av fleire utstillingar om det moderne Noreg i samband med Hundreårsmarkeringa. I Tromsø visast "Det kvite eventyret - Polar-Noreg 2005" fram til mai 2006, i Trondheim visast "Techne - Teknologi og det moderne Noreg 1905-2005" frå 28. mai til 31. august 2005. Nobels fredssenter opnar 11. juni, der delar av utstillinga omhandlar den fredelige unionsoppløysinga.
Samarbeid med Hordaland fylkesarkiv
Havlandet er eit samarbeid mellom Universitetet i Bergen, Bergen Museum, Bergens Sjøfartsmuseum, Norges Fiskerimuseum, Norsk Oljemuseum, Vestlandske Kunstindustrimuseum, Bergen offentlige bibliotek, Bergen byarkiv, Hordaland fylkesarkiv, Universitetsbiblioteket og Kunsthøgskolen i Bergen. Utstillinga er gjeve form av Hanna Hilt Design.