Fylkesutvalet meiner at før det vert innført nye vernetiltak, må det gjennomførast ei evaluering og ei konsekvensutgreiing der føremålet må vera å sikra villaksen best mogleg, og at eventuelle reguleringar ikkje hindrar ei vidare utvikling av oppdrettsnæringa. Fylkesutvalet meiner at oppdrettsnæringa må halda fram arbeidet med å hindra rømming og utvikling og spreiing av lakselus.
Vedtaket i fylkesutvalet vart gjort med 11 (H, Frp, KrF, Ap) mot 4 (Sp, V, SV, RV) røyster.
Fylkesutvalet peikar på at oppdrett av laks i Hordaland er ei svært viktig næring og representerer ei verdiskaping på ca. 2 milliardar kroner i fylket. Næringa er i sterk utvikling også med andre marine artar, og betyr svært mykje for ei desentralisert sysselsetjing i fylket. Eit vernetiltak vil med dagens situasjon ramma 18 konsesjonar i Hardangerfjorden og 11 i Osterfjorden med ei direkte verdiskaping på over 300 mill. kr, påpeikar utvalet.
Mindretalet på fire (Sp, V, SV, RV) røysta for dette forslaget:
«1. Fylkesutvalet i Hordaland meiner både Vosso og Eidfjordvassdragt må få status som nasjonale laksevassdrag. Dersom det berre er rom for eit nytt laksevassdrag i Hordaland meiner fylkesutvalet at Vosso med den særmerkte storvaksne laksen må prioriterast.
2. Fylkesutvalet går inn for oppretting av nasjonale laksefjordar i Osterfjordbassenget og i Hardangerfjorden avgrensa til eksisterande mellombelse sikringssonar.
3. Fylkesutvalet meiner det er viktig med sterkt fokus på rømings- og luseproblematikken i Hardangerfjorden - uavhengig av eventuell status som nasjonal laksefjord. I denne oppdrettsintensive fjorden må det etablerast tilpassa restriksjonar til dei reelle problema for fjordsystemet.»
Stanley Hauge