Stein Mortensen frå Havforskingsinstituttet (t.v.) og prosjektleiar Björgolfur Håvardsson i Hordaland fylkeskommune presenterte lite nytta fiskeartar på ”Sjømat for alle”-arrangementet i Bergen.
- Berre nokre titals artar vert nytta kommerselt i Noreg, fortel Björgolfur Håvardsson. Han er leiar av Sør-Noreg-delen av prosjektet betre nytting av lite nytta kystnære ressursar (LUR). Prosjektet er forankra i Hordaland fylkeskommune.
Etterspurd
Håvardsson fortel at langs kysten finn vi fleire hundre ulike fiskeartar, krepsdyr, pigghuder, sniglar, muslingar og algar.
- Mange av desse er etterspurde i andre land eller kan bli nye, spanande sjømatprodukt i Noreg. Ved å auke nyttinga av desse kan vi auke verdiskapinga samstundes som kystfiskarar får fleire bein å stå på. Glasmanet, slimål og sjøpølse er kan hende litt for eksotisk for norske ganar, men er alt godt betalte produkt i utlandet. Mange flatfiskartar, leppefisk, sniglar og muslingar kan derimot bli meir populær kost også i Noreg.
Lære noko dei vaksne ikkje kan
Prosjektet skal mellom anna identifisere aktuelle artar, marknadspotensial og flaskehalsar i verdikjeda.
- Ei open haldning og respekt for andre lands matkultur er viktig når vi skal utvikle desse artane som eksportprodukt. Vi freistar samstundes å inspirere ungdom i vidaregåande skule til å starte ungdomsbedrift innan fiskeri- og kokkefag med desse artane. Ungdommen får prøve noko nytt og spanande som dei vaksne er skeptiske til, samstundes som det er mogeleg å lære noko dei vaksne ikkje kan, seier prosjektleiar Björgolfur Håvardsson.
Meir informasjon om verdiskaping i kystsona
