Stord lufthamn, Sørstokken, har kraftig trafikkvekst. I august månad hadde lufthamna 3.700 passasjerar. Dette er ein auke på 1.675 passasjerar eller 82,7% i høve til same månad i fjor.
2.745 passasjerar reiste med rutefly til og frå Stord lufthamn i august, mens 560 passasjerar reiste med charterfly til og frå lufthamna. I tillegg hadde flyplassen 395 charterpassasjerar i transitt. I dei første åtte månadene i år har det reist 21.920 passasjerar over lufthamna. Dette er ein auke på 2.739 eller 14 % i høve til same periode i fjor.
- Målet til lufthamnstyret på 35.000 passasjerar i 2004 er såleis godt innan rekkevidde, seier lufthamnsjef Jan Morten Myklebust.
God jobb
Myklebust fortel at flyselskapet Coast Air, som overtok ruta Stord-Oslo-Stord frå Golden Air i august månad, så langt har gjort ein svært bra jobb på lufthamna.
- Flyelskapet har hatt 100 % regularitet på flygingane sine, og flya har vore i rute. Coast Air nyttar flytypen ATR-42 med 48 passasjerseter på strekninga Stord-Oslo-Stord.
Golden Air sin Saab-340B hadde berre 36 passasjerseter. Stord lufthamn har såleis fått større setekapasitet på flya som no trafikkerar Oslo.
Rundturar til Alta
Flyselskapet Atlantic Airways flyg kvar onsdag 2 rundturar Stavanger-Stord-Alta-Stord-Stavanger med Aker/Kværner tilsette som arbeider på Snøkvitprosjektet i Hammerfest. Atlantic Airways nyttar flytypen BAE-146 med 95 passasjerseter. Atlantic Airways i samarbeid med Aker/Kværner hadde i sommar tilbod på flyturar frå Stord til Færørøyene. Fleire sunnhordlendingar nytta seg av tilbudet og besøkte øya vest i havet.