Kultur- og kyrkjedepartementet har gjeve tilsegn om statstilskot på inntil 15,8 mill. kr til første byggjesteg av konserveringsverkstader og fellesmagasin for musea i Hordaland. Verkstader og magasin er under etablering ved Museumssenteret i Salhus.
— Dette er ei svært gledeleg melding for heile museums-Hordaland. Behovet for konserveringsverkstader og magasin for å ta vare på dei mange verneverdige gjenstandar musea i dag må lagra i lite eigna lokale, er svært stort. Statstilskotet saman med midlane fylkeskommunen har stilt til rådvelde, gjer at realiseringa av prosjektet i Salhus, kan starta for fullt, seier fylkesordførar Torill Selsvold Nyborg.
I brev datert 27. september 2004 gjev Kultur- og kyrkjedepartementet tilsegn om 6 mill. kr i tilskot i 2004, og seier samstundes at det skal gjevast tilskot på ytterlegare 9,8 mill. kr fordelt på åra 2005-06.
Tilsegna frå departementet er gjeven med føresetnad om at prosjektet kan gjennomførast og fullfinansierast innan ei ramme på 15,8 mill. kr i statstilskot. Statstilskotet skal maksimalt utgjera 60 % av prosjektkostnadene.
Hordaland fylkeskommune har til og med 2004 løyvd 12,3 mill. kr til konserveringsverkstader og magasin for musea i fylket. Av denne summen er 8 mill. kr nytta til kjøp av bygga i Salhus og ymse vedlikehaldsarbeid der. I gjeldande økonomiplan 2004-07 er det vidare sett av 2 mill. kr årleg frå fylkeskommunen til prosjektet.
Fylkeskommunen si løyving utgjer hovudtyngda av midlane til prosjektet utanom statstilskotet.
Stanley Hauge