Hordaland fylkesting ber om at Stordalstunnelen i Etne vert framprioritert i samband med opplegg for bompengefinansiering av tiltak på E134. Fylkestinget sitt vedtak om dette er gjort i høyringsfråsegna til fylkesdelplanen for Haugalandet.
Fylkesdelplanen for Haugalandet er den første felles plan for Rogaland og Hordaland og femner om kommunane Haugesund, Karmøy, Tysvær, Bokn, Sauda, Vindafjord, Ølen i Rogaland og Sveio og Etne i Hordaland.
Planen har som hovudtema samordna areal- og transportplanlegging og legg opp til ei satsing på vidare utbygging av vegnettet gjennom ekstraordinær finansiering med bompengar.
Fylkesdelplanen for Haugalandet gjev eit godt oversyn over utfordringar og strategiar for utvikling av areal- og transportmønster i Haugalandsområdet, meiner Hordaland fylkesting.
Fylkestinget har i hovudsak vedteke planen for den delen som gjeld Sveio og Etne, og rår til at heile planen vert godkjent.
SV fremja forslag om at det ikkje skal byggjast ny veg mellom Etne og Sauda. Dette fekk SV sine seks røyster og fall.
Stanley Hauge