Fleirtalet i kultur- og ressursutvalet i Hordaland vil ikkje ha landingsplass for helikopter ved Fossetrommi i Eidfjord. Grunngjevinga er å skjerme Vøringsfossplatået mot aktivitet som kan redusere opplevingsverdien av området.
Sju mot fire
I tilråding til fylkesutvalet går kultur- og ressursutvalet inn for å fremje motsegn mot forslaget Eidfjord kommune har om landingsplass for helikopter i kommunedelplan for Sysendalen. Tilrådinga er med sju (A, SV, Sp, KrF og P) mot 4 (Frp og H) røyster.
Utvalet ber samrøystes om at det skal leggast særleg vekt på estetikk ved utforming av reiselivsanlegg og hytteområde i Sysendalen.
Nye hytteområde
Utvalet vil ikkje fremje motsegn, slik fylkesrådmannen hadde tilrådd, mot nye hytteområde sør for Bjoreia, nytt hytteområde på Holmen i Bjoreio og traktorveg sør for Bjoreio. Mindretalet på fem røysta for motsegn (A, SV, Sp).
Utvalet er samrøystes om at nyare tids kulturminne bør vurderast grundigare i samband med reguleringsplanarbeidet for det einskilde område og at Hordaland fylkeskommune må ta eit generelt atterhald for endra arealbruk i høve til hittil ikkje registrerte automatisk freda kulturminne. Undersøkingsplikta etter kulturminnelova må oppfyllast i samband med framlegg til reguleringsplan.
Eitt av landets mest kjende landskapsrom
I saksutgreiinga heiter det at Sysendalen har verdi som regionalt friluftsområde både sommar og vinter for ulike aktivitetar. Naturkvalitetane bør vere tilgjengelege for både tilreisande og fylket sine eigne brukarar.
Området mellom Fossli og Hardangervidda-platået inneheld eitt av Hordalands, og landets, mest kjende landskapsrom. Det er ein svært viktig stoppestad for turistar som reiser langs riksveg 7 og ynskjer å oppleve Vøringsfossen. Riksveg 7 gjennom området er turistveg, og det vil bli lagt til rette for meir turisme langs vegen gjennom offentleg satsing. Det er viktig at kommuneplanane har felles mål og stør opp under denne satsinga. Landskapskvalitetane må sikrast gjennom arealdisponeringa. Strenge estetiske krav i føresegnene til planen må leggjast til grunn for utbygginga.
Saka skal opp i fylkesutvalet 1. april.
Eli Lothe