Stamvegen mellom Bergen og Os skal få ny trase mellom Rådal og Svegatjørn og vil koste om lag 1,9 milliardar kroner. Bompengar skal dekka halvparten av kostnaden. Den andre halvparten skal staten betale. For liten bil vil bompengeavgifta utgjera 19 kroner, med rabattar på 30, 40 og 50 prosent.
Bompengane skal gå til firefelts motorveg Svegatjørn-Rådal, delvis utbygging av Rådalskrysset, bygging av tverrsamband til Lysefjorden, samt opprusting av fylkesvegnettet i Lysefjordområdet.
Den vidare planen er at Stortinget skal godkjenne bygging og finansiering hausten 2007, med sikte at byggjeperioden vil bli frå 2008 med vegopning i 2011. Målet er at veganlegget skal stå ferdig i 2011 og at bompengeperioden vert 15 år frå opningstidspunktet, dvs. fram til 2026.
Fylkestinget legg til grunn at det aktuelle bompengeopplegget for E39 Svegatjørn-Rådal vert innarbeidd i Vestlandsrådet si samla finansieringspakke for E39 Kyststamvegen.
Mette Holmefjord Olsen (SV) føreslo at fylkestinget skulle utsetja saka og senda ho på høyring før endeleg vedtak. Forslaget fekk seks røyster (SV) og fall. Ho føreslo også at fylkestinget skulle seia seg lei for at berørte kommunar som Stord, Fitjar, Tysnes, Kvinnherad og Fusa ikkje har fått høve til å uttala seg om finansieringsmodellar. Dette forslaget fekk åtte røyster (SV, RV) og fall.
Harald Hove (V) føreslo at fylkestinget i denne omgang heller ikkje skulle vedta at det skal krevjast inn førehandsbompengar på ferjestrekninga Halhjem-Sandvikvåg, men at spørsmålet skal vurderast i det vidare arbeidet med saka og etter at spørsmålet har vore ute på høyring. Forslaget fekk to røyster (V) og fall. Venstre støtta deretter subsidiert forslaget som fekk fleirtal.
Sunniva Schultze-Florey (RV) føreslo på vegner av RV og SV at fylkestinget skulle vedta at finansieringa av den nye vegen Rådal-Svegatjørn er eit statleg ansvar og avvisa bompengar. Forslaget fekk åtte røyster (RV, SV) og fall.
Stanley Hauge