Fylkesutvalet i Hordaland rår samrøystes fylkestinget til å godkjenna at kostnadsramma for Tusenårsstaden i Øystese vert auka med 7,5 mill. kr til 35 mill. kr. Kostnadsauken skal delast like mellom Kvam herad og fylkeskommunen, med 3,75 mill. kr på kvar.
Fylkesutvalet si tilråding er gjeven med atterhald om at Kvam heradsstyre, som skal gjera sitt vedtak 25. mai, godkjenner sin del av kostnadsauken.
I eit eige punkt tilrår fylkesutvalet at fylkestinget skal vedta at den auka løyvinga må dekkast innanfor kulturbudsjettet. Dette vart tilrådd med 8 (H, Frp, KrF) mot 7 (Ap, SV, V, Sp) røyster.
Fylkestinget skal handsama saka på møte i Ulvik 8.-9. juni.
Fylkesrådmannen har funne det uråd å redusera kostnadsramma for prosjektet til 27,5 mill. kr, slik fylkesutvalet 25. februar bad om å få vurdert. Kostnadene ut frå anboda var på 37,4 mill. kr. Fylkesrådmannen har funne at det må kunna aksepterast å ta bort arealet for utegalleriet (spissen på tusenårsstadbygget), noko som reduserer kostnaden med 0,9 mill. kr. I tillegg føreslo han å sløyfa tilbygget til Ingebrigt Vik museet og dermed redusera kostnaden med ytterlegare 1,5 mill. kr. Samla reduksjon vert dermed 2,4 mill. kr til 35,0 mill. kr.
Opplegget no er at Kvam herad tek sikte på å finansiera tilbygget til Ingebrigt Vik museet.
Stanley Hauge