Samferdselsutvalet i Hordaland gjekk i dag samrøystes inn for å byggje Jondalstunnelen og skisserer eit opplegg som fullfinansierer prosjektet på rundt 500 millionar kroner.
Etter felles gruppemøte samla samferdselsutvalet seg om eit felles framlegg for Jondalstunnelen.
Førsteprioritet
Etter at Torill Vebenstad, Arbeidarpartiet, fremja forslag om bygging av tunnelen, gjekk utvalet i felles gruppemøte og vart samde om den felles tilrådinga som gjev Jondalstunnelen førsteprioritet som fylkesvegprosjekt i Hordaland.
180 millionar i konsesjonskraftmidlar
Fullfinansieringa av tunnelen er sikra ved bruk av fylkeskommunale konsesjonskraftmidlar på 180 millionar kroner. Resten av summen skal finansierast av staten (innanfor statlege overgangsordningar for større fylkesvegprosjekt), ordinære fylkeskommunale vegmidlar, kommunale tilskot frå kommunar i Hardanger, bompengar og årlege kompensasjonsmidlar for auka arbeidsgjevaravgift.
Redusert tverrsnitt i tunnelen
Samferdselsutvalet tilrår å redusere tverrsnittet i tunnelen frå profil T8,5 til T8. Det er same tverrsnitt som for Folgefonntunnelen.
Saka går vidare til fylkesutvalet 27. mai. Endeleg vedtak skjer på fylkestinget i Ulvik 8.-9. juni.
Bjarte Brask Eriksen