Utbetaling vert fordelt over åra 2004-2006. Ekspressheis Bavallen får 1,0 mill. kr i 2004, 1,75 mill. kr i 2005 og 0,25 mill. kr i 2006. Dale fabrikkutsalssentrum får 0,5 mill. kr i 2004 og 1,0 mill. kr i 2005. Folgefonn a informasjons- og nasjonalparksenter (FONN) får 0,5 mill. kr i 2004 og 1,5 mill. kr i 2005.
SV føreslo at Smeltedigelen Odda skulle få tilskot i staden for Ekspressheis Bavallen. Forslaget fekk to røyster (SV) og fall.
Fylkeskommunen har sett av 21,5 mill. kr til strategisk viktige prosjekt for åra 2004-06, fordelt med 4,5 mill. kr i år og 8,5 mill. kr årleg i 2005-06. 11 mill. kr av den samla summen er disponert til cruiseskipskai i Eidfjord. Med tildelinga no er 17,5 mill. kr av midlane disponert.
Ekspressheis Bavallen
Voss kommune har på vegner av selskap under stifting søkt om kr 8,3 mill kr til bygging av ny ekspressheis med 4 seter pr stol i Bavallen. Prosjektet er kostnadsrekna til 37 mill kr inkludert 5 mill kr i infrastruktur som hus, veg, straum etc. Voss kommune har løyvd 3 mill kr til prosjektet, medan 20 mill. kr vert finansiert gjennom lån og eigenkapital saman med Voss Fjellheiser AS. Det er også budsjettert med 5,7 mill, kr i spelemidlar.
Dale Fabrikkutsalssentum
Vaksdal næringsselskap ynskjer å skape eit regionalt fabrikkutsalsentrum for fleire merkevareprodusentar. Samling av fabrikkutsal, lokalisert utanfor byar og større sentra, har hatt stor suksess i USA (Freeport Maine) og i Europa. Samling av fabrikkutsal (factory outlets) der ein får høve til å handle merkevarar til gunstige prisar er eit tilbod som mange tilreisande finn interessant.
Fabrikkutsalsentrumet er tenkt lokalisert på Dale og vil vere det første av sitt slag i Noreg. Plassering når det gjeld avtand til storby og plassering nær ei hovudferdselsåra + togline er gunstig; langt nok unna Bergen til at det ikkje er konkurransevridande i høve til eksisterande forhandlarar, kort nok som halvdagsutflukt for turistar i Bergen.
Dale of Norway-produkta vil ha ein naturleg plass, men senteret er tenkt å huse fabrikkutsal for minst 10 ulike kjende merkevarar både frå inn- og utland. Det er eit ynskje om breidde i vareslag; tekstil, fritidsutstyr, glas/steintøy/dekketøy m.m.
Vaksdal næringsselskap har søkt om 4 mill kr i tilskot til prosjektet. I første fase skal ein pusse opp eksisterande bygg, seinare er det trong for nybygg. Totalbudsjettet for prosjektet er på 10 mill kr. Vaksdal næringsselskap, Vaksdal Næringspark og Vaksdal kommune skal bidra med midlar i prosjektet.
Folgefonna informasjons- og nasjonalparksenter
Kvinnherad kommune har søkjt om 4 mill kr til nasjonalparksenter for Folgefonna nasjonalpark (FONN). FONN skal vere eit desentralisert informasjonssenter med hovudbase i Rosendal, der ein utviklar besøksmål og profilerer desse i alle dei 5 involverte kommunane (Etne, Kvinnherad, Jondal, Ullensvang og Odda). Investeringsbudsjettet er på 8,75 mill kr, der 2,5 mill kr er sett av til steinpark og 5,5 mill avsett til andre besøksmål og utstillingslokale i kommunane. På sikt ynskjer ein å gjere senteret til eit nasjonalt og internasjonalt kompetanse- og kunnskapssenter basert på heilskapstenking innan natur, kultur, næring og utvikling.
Stanley Hauge