I det skisserte finansieringsopplegget er det lagt til grunn at byggjearbeida startar i 2006 og at tunnelen vert teken i bruk frå årsskiftet 2008-09. Finansieringsopplegget som er føreslege, fører til at fylkeskommunen sine låneopptak til prosjektet må aukast med 117,1 mill. kr i høve til det som er lagt til grunn i fylkesvegplanen. Fylkestinget har reservert 117 mill. kr av framtidige konsesjonskraftinntekter til delvis dekking av kapitalutgiftene fylkeskommunen får som følgje av auka låneopptak til realisering av Jondalstunnelen.
Fylkestinget har godkjent at Jondalstunnelen vert bygd etter alternativ S1+S9+N2, med tunnelprofil T8 (tverrsnitt 8 meter).
Den vedtekne finansieringsplanen for Jondalstunnelen føreset følgjande:
– at Stortinget løyver 50 mill. kr til Jondalstunnelen i 2005, jf. overgangsordninga for store fylkesvegprosjekt.
– at verksemder i Hardanger og Sunnhordland garanterer som sjølvskuldnarkausjonistar for eventuell svikt i kompensasjonsmidlar for auka arbeidsgjevaravgift med inntil 75,6 mill. kr.
– at tilskota på i alt 55,05 mill. kr frå kommunane Kvam, Odda og Jondal vert innbetalt til fylkeskommunen i 2007.
– at kommunane Odda, Kvinnherad og Jondal stiller til rådvelde inntil 30 mill. kr av eventuelle overskotsmidlar frå bompengeinntektene i Folgefonntunnelen for å redusera uvissa i prosjektet Jondalstunnelen. Summen vert utløyst om bompengeinntektene i Jondalstunnelprosjektet sviktar i høve til føresetnadene.
Konsesjonskraftpengar
Fylkestinget sitt vedtak føreset at om lag 136 mill. kr av midlane til Jondalstunnelen skal koma frå fylkeskommunen sine konsesjonskraftinntekter. Konsesjonskraftinntekter skal dekka dei19,5 mill. kr i driftsmidlar som fylkeskommunen går inn med og 117 mill. kr av lånekostnadene.
I perioden frå 2007 til 2012 skal 30 % av konsesjonskraftinntektene med årleg frådrag av 8,5 mill. kr til utviklingsprosjekt gå til Jondalstunnelen. Etter 2012 skal heile konsesjonskraftinntekta med unnatak av 8,5 mill. kr til utviklingsprosjekt reserverast Jondalstunnelen, inntil heile den føresette summen er dekka.
Fram til og med 2012 er 70 % Hordaland fylkeskommune sine konsesjonskraftinntektene tildelt Hardangerbrua.
Stanley Hauge