I det skisserte finansieringsopplegget er det lagt til grunn at byggjearbeida startar i 2006 og at tunnelen vert teken i bruk frå årsskiftet 2008-09. Finansieringsopplegget som er føreslege, fører til at fylkeskommunen sine låneopptak til prosjektet må aukast med 117,1 mill. kr i høve til det som er lagt til grunn i fylkesvegplanen. Fylkesrådmannen føreslår at fylkestinget reserverer 117 mill. kr av framtidige konsesjonskraftinntekter til delvis dekking av kapitalutgiftene fylkeskommunen får som følgje av auka låneopptak til realisering av Jondalstunnelen.
Innstilling
Fylkesrådmannen si tilråding er at fylkesutvalet skal gjera følgjande innstilling til fylkestinget:
«1. Fylkestinget godkjenner prosjektet Jondalstunnelen, alternativ S1+S9+N2, tunnelprofil T8.
2. Fylkestinget godkjenner slik finansieringsplan for prosjektet:
Statstilskot (overgangsordninga for store fylkesvegprosjekt) 50,0 mill. kr
Kompensasjonsmidlar for auka arbeidsgjevaravgift/ innbetalingar frå verksemder i Hardanger/Sunnhordland 75,6 mill. kr
Tilskot frå kommunane Kvam, Odda og Jondal 55,1 mill. kr
Bompengar 110,6 mill. kr
Driftsmidlar 19,5 mill. kr
Lån 218,6 mill. kr
Sum 529,4 mill. kr
3. Finansieringsplanen for Jondalstunnelen føreset følgjande:
a) at Stortinget løyver 50 mill. kr til Jondalstunnelen i 2005, jf. overgangsordninga for store fylkesvegprosjekt.
b) at verksemder i Hardanger og Sunnhordland garanterer som sjølvskuldnarkausjonistar for eventuell svikt i kompensasjonsmidlar for auka arbeidsgjevaravgift med inntil 75,6 mill. kr.
c) at tilskota på i alt 55,05 mill. kr frå kommunane Kvam, Odda og Jondal vert innbetalt til fylkeskommunen i 2007.
d) at kommunane Odda, Kvinnherad og Jondal stiller til rådvelde inntil 30 mill. kr av eventuelle overskotsmidlar frå bompengeinntektene i Folgefonntunnelen for å redusera uvissa i prosjektet Jondalstunnelen. Summen vert utløyst om bompengeinntektene i Jondalstunnelprosjektet sviktar i høve til føresetnadene.
4. Fylkestinget vedtek at 30 % av konsesjonskraftinntektene utanom 8,5 mill. kr til utviklingsprosjekt skal gå til Jondalstunnelen frå og med 2007 og til og med 2012.
Det skal skaffast 117 mill. kr frå konsesjonskraftmidlar til finansieringsopplegget for Jondalstunnelen i perioden etter 2009. Fylkestinget føreset at denne summen vert nådd ved å reservera midlar som nemnt i første avsnitt til og med 2012 og deretter skal heile konsesjonskraftinntekta med unnatak av 8,5 mill. kr til utviklingsprosjekt reserverast inntil 117 mill. kr er skaffa.»
Saksførelegg til fylkesutvalet og fylkestinget, sak «Jondalstunnelen – finansieringsplan»
Stanley Hauge