Grafen viser utviklinga av tannhelsa til 5-åringar i Hordaland samanlikna med landsgjennomsnittet. 5-åringar i Hordaland har hatt litt dårlegare tannhelse enn landsgjennomsnittet, men skilnaden har vorte mindre dei siste åra.
Verre hjå 12-åringane
Hos 12-åringane ser vi ei lita forverring i tannhelsa. Gjennomsnitt DMFT (tenner med tannrote eller fylling) for 2003 var 2,0 mot 1,9 i 2002. Målet for 12-åringane i 2007 er eit gjennomsnitt på mindre enn 1,6 tenner med hol eller fylling. Skal det vera mogeleg å nå dette målet, må den uheldige utviklinga dei siste 4 åra bli snudd, skriv fylkestannlegen i årsmeldinga.
18-åringane betre
Tannhelsa til 18-åringane har blitt jamt betre det siste tiåret. I 2003 var gjennomsnittleg tal tenner med tannrote eller fylling hos 18-åringane 5,6 mot 5,9 i 2002. Det ser derfor ut til at målet om eit gjennomsnitt på under 5,2 tenner med tannrote eler fylling i 2007 skal vere innan rekkevidde. I 2003 hadde 14,3% av 18-åringane feilfrie tenner mot 12,6% i 2002.
Behandling i lystgass
Alle tannhelsedistrikt i Hordaland har eit tilbod om tannbehandling i lystgass. Tjuefire tannlegar utførte tannbehandling i lystgass ved 14 klinikkar i 2003, og i alt 418 pasientar vart behandla. Gjennomsnitt behandlingstid var 2,27 timar.
Narkose
Tannbehandling i narkose til prioritert klientell vert gitt ved Haukeland universitetssjukehus og ved Stord sjukehus. På Stord har det også blitt behandla vaksne pasientar i narkose. I Bergen var tal nye tilviste pasientar 149. Til saman 153 pasientar var behandla ved Haukeland universitetssjukehus og 40 pasientar på Stord. Det er rydda i ventelistene ved Haukeland, og per 1.1.04 var ventelista redusert til 64 personar.
Stoffavhengige
I samarbeid med Bergen kommune ved Strax- huset vart det i 2003 etablert eit lågterskeltilbod til personar med rusproblem ved tannlegevakta i Bergen. Det har tidlegare ikkje vore eit tannhelsetilbod tilpassa stoffavhengige personar i Hordaland, og dei første erfaringane med tiltaket er positive. Også i Os kommune er eit liknande forsøk sett i gang.
Stanley Hauge