Vestlandsrådet krev at Olje- og energidepartementet grip inn med verkemiddel som kan hindra at norsk petroleumsnæring vert unødig redusert dei komande åra. I ei fråsegn til olje- og energiministeren peikar rådet på at det kan takast i bruk enkle verkemidd
Vestlandsrådet trekkjer fram desse tiltaka som aktuelle å gjennomføra :
· Innføring av nye skattereglar, der særskatten på nye felt vert redusert. Dette vil auka interessa for norsk sokkel. I denne samanhengen vil vi visa til den positive utviklinga i Storbritannia og i Mexico-golfen der innføring av nye skattereglar førte til ny optimisme og aktivitet i oljenæringa
· Stimulere til auka haleproduksjon for eksisterande felt.
· Tilrettelegging slik at mindre felt kan utviklast ved å knyta dei opp til felt som alt er i produksjon
· Betre reglar for avskriving
· Tilgang på nytt leiteareal
Vestlandsrådet peikar på at oversikter, som er utarbeidde den siste tida, klart viser at aktiviteten på norsk sokkel er i ferd med å gå ned, og talet på sysselsette innan petroleumsnæringa i Noreg har det siste året vorte redusert med rundt 5000 personar.
Rådet ser denne trenden er svært uheldig, og endå meir urovekkjande er det at denne utviklinga vil forsterka seg om ikkje noko vert gjort for å halda opp aktiviteten på norsk kontinentalsokkel.
75 prosent av dei personane som har sitt daglege arbeid innan petroleumsnæringa i Noreg kjem frå Rogaland, Hordaland, Sogn og Fjordane og Møre og Romsdal. Vestlandsrådet peikar på at mange av desse arbeider i viktige leverandørbedrifter i distrikta, og desse bedriftene er hjørnesteinsverksemder i dei lokalsamfunna der dei høyrer heime.
Rådet viser også til at i bedriftene er det gjennom mange år utvikla kompetanse som på fleire område har plassert Noreg i verdstoppen. Dette gjev grunnlag for ytterlegare utvikling og verdiskaping.
Det seier seg difor sjølv at ei vidare nedbygging av aktivitetane på norsk sokkel kjem til å få alvorlege følgjer for sysselsetjinga og verdiskapinga på Vestlandet i framtida.
Stanley Hauge