Det nye nasjonale løyveregisteret skal mellom anna brukast til kontroll av drosjer: Mona Sanden Olivier, samferdselsdepartementet (f.v.), Grethe Blystad, Hedmark, Jann Roar Pettersen, Nord Trøndelag, Åge Sellevåg, Hordaland, og Jan Eirik Søraas, Møre og Romsdal, er alle glade for det nye registeret.
Vesentleg betre
- Vi får no vesentleg betre høve til å kontrollere at transport av personar og gods på vegane skjer på ein trygg og kvalitetsmessig god måte, seier samferdselsministeren.
Registeret omfattar alle som har løyve til å transportere personar og gods: Drosjeløyve, selskapsvognløye, turvogn-, godsvogn- og handikapløyve. Under kontroll langs vegane kan politi og Statens Vegvesen gå inn i registeret og sjekke om køyretøya køyrer lovleg, om dei har forsikring og papir i orden.
2 millionar kroner
Det nye registeret har kosta Hordaland fylkekommune 1,2 millionar kroner å utvikle og er fysisk plassert på datamaskin i fylkeshuset i Bergen. Dei andre fylka i landet har kjøpt seg inn i systemet. I tillegg har samferdselsdepartementet sett nytten og bidrege med 200.000 kroner.
Prosjektleiar Åge Sellevåg i Hordaland fylkeskommune fortel at registeret er internettbasert. Det medfører at opplysingane frå løyveregisteret blir henta fram på datamaskin på same måte som ein hentar fram informasjon på nett.
- Dette er eit stort framsteg. Tidlegare hadde kvart fylke sitt eige register lagra i kvar sin database. No blir alle opplysingar lagra i eit nasjonalt løyveregister. Dette forenklar arbeidet, seier Sellevåg.
Fungerer svært bra
Mona Sanden Olivier i samferdselsdepartementet har og berre godt å seie om det nye registeret.
- Det fungerer svært bra. No har vi fått eit operativt, sentralt løyveregister for sakshandsaming og effektiv kontroll, seier Olivier.
Grethe Blystad i Hedmark fylkeskommune er og svært nøgd.
- Vi har hatt det gamle systemet som låg i ein database i 3-4 år. No har vi fått det nye webbaserte som er skreddarsydd for sakshandsaming av løyva. Det er stor forbetring i høve til det gamle, seier Blystad.
Pioner
Dette er ikkje første gongen samferdselsavdelinga i Hordaland er pioner på dette området. I 1994 utvikla dei databasen som fylka har nytta til sitt lokale løyveregister.
- I EØS-avtalen kom det krav om at alle løyvehavarar skulle ha bankgaranti. Dessutan kom det ny samferdselslov i fjor som og omfattar eit sentralt løyveregister. Vi greip tak i dette og sette ein datautviklar til å utvikle registeret. Vi har ikkje høyrt noko negativt om det nye systemet. Alle er positive, seier Sellevåg.
Bjarte Brask Eriksen