Konst. opplæringsdirektør Svein-Erik Fjeld overleverte blomster til lærar Christiane Schmidt ved Bergen handelsgymnasium og ein PDA til elev Kristin Thorvaldsen. Kjetil Brathetland er prosjektleiar for Skoleportalen.
Motiverer skulearbeidet
Konstituert opplæringsdirektør Svein-Erik Fjeld er oppglødd over at læraren og elevane hennar har vore så flinke til å ta det nye verktøyet i bruk og hausta positive røynsler med det. Schmidt brukar Skoleportalen og e-læringsverktøyet der i alle fag, mellom anna blir oppgåver lagt ut, og elevane leverer inn svar i e-læringsverktøyet.
- Dette gjer oss elevar meir motiverte til skulearbeid. Det er meir tilrettelagt, og vi får fort svar på arbeida vi leverer inn, seier Thorvaldsen.
Klassen har og brukt Skoleportalen til å lage nettavis på tysk. Den er tilgjengeleg via heimesida til Bergen handelsgymnasium.
75 rette mellom 1000 svar
Kristin Thorvaldsen går på økonomisk-administrativ linje og var ein av godt over tusen elevar som prøvde seg på ein quiz som vart lagt ut på Skoleportalen. Skoleportalen er nettstaden for elevar og lærarar i den vidaregåande skulen i Hordaland. Av dei ca 1000 svara som kom inn, var det 75 som var heilt rette.
Overraska
Prosjektleiar for Skoleportalen, Kjetil Brathetland, opplyser at dei trekte ut vinnaren mellom desse 75. Kristin Thorvaldsen vart positivt overraska over at ho vann.
- Eg opna Skoleportalen og fann spørjekonkurransen, svarte og gløymde det heile. Eg hugsar det var ein premie som eg ville ha, men hugsa ikkje kva det var då eg fekk vite at eg hadde vunne, seier Thorvaldsen.
Stille revolusjon
Etter lanseringa i fjor haust, har Skoleportalen og e-læringsverktøyet blitt populært i den vidaregåande skulen.
- Vi har no 5000 elevar og 900 lærarar som brukarar, og det aukar stadig. Til hausten reknar vi med at alle elevar og lærarar brukar dette verktøyet. Det skjer ein stille revolusjon, seier Brathetland.
Bjarte Brask Eriksen