Fleirtalet i Hordaland fylkesutval vil ha hyttebygging i det omstridde området på Hjølmo i Eidfjord og bygging av veg til Viveli. Med 12 mot 3 røyster går fylkesutvalet inn for hyttebygging, mens 9 mot 6 går inn for veg til Viveli.
Snudde
Arbeidarpartiet og Senterpartiet har snudd etter tilrådinga i kultur- og ressursutvalet 18. august og røysta for hyttebygging saman med Høgre, Fremskrittspartiet og Kristeleg Folkeparti. Dei tre som røysta i mot var SV og Venstre.
Omdiskutert veg
Bygging av veg til Viveli er meir omdiskutert. Der står Arbeidarpartiet fast på tilrådinga i kultur- og ressursutvalet om å gå imot veg til Viveli. Senterpartiet røysta saman med Høgre, Fremskrittspartiet og Kristeleg Folkeparti og sikra fleirtal med 9 røyster, mens Arbeidarpartiet røysta saman med SV og Venstre mot bygging av vegen.
Unngå konflikt med kulturminna
For at det ikkje skal bli konflikt med kulturminna i området ber fleirtalet om at Eidfjord kommune ser nærmare på reguleringsplanen.
Vedtaket i fylkesutvalet er ei fråsegn til kommunedelplan for Hjølmo-Viveli.
Veg til Viveli vil gjere tilgangen til Hardangervidda lettare. Miljøverndepartementet har tidlegare sagt nei til denne vegen.
Bjarte Brask Eriksen