Fylkesutvalet i Hordaland går inn for å verne fleire jernbanestrekningar. Dette gjeld Finse-Høghellar, Rallarvegen, Midttun-Garnes-Trengereid og Flåmsbana.
Det er Jernbaneverket som har utarbeidd ein verneplan for eigne anlegg og verksemd. Denne er sendt på offentleg høyring. Verneplanen utgjer eit verdfullt dokument i høve til å tilretteleggja for langsiktig forvalting av jernbanens kulturminne som er viktige for forståinga av det moderne Noreg. I saka er det gjeve særskilt merksemd til den delen av jernbanens kulturminne som ligg innafor Hordaland fylke sine grense.
Fylkesutvalet sluttar seg til verneplanen som eit verdfullt grunnlag for langsiktig forvalting av jernbanerelaterte kulturminne med følgjande merknadar: Bergensbanens høgfjellstrekning Finse-Høgheller og Rallarvegen får status som freda kulturminne i kategori B, det vil seie vern etter plan- og byggingslova. Vedteke med 13 mot ei røyst (V). Venstre ønskte heller freding etter kategori A som vil seie freding etter kulturminnelova.
Veteranstrekninga Midttun-Garnes-Trengereid får status som freda kulturminne i kategori A. Flåmsbana får og eit formelt vern etter kategori A.
Vidare føreset fylkesutvalet at Jernbaneverket vil tilføra ressursar til vedlikehald av verneverdige og freda kulturminne innanfor jernbanen og at museumsmiljø og det frivillige vernearbeidet får naudsynte driftsmidlar til å ta vare på og vidareutvikla kunnskapen om vern, vedlikehald og formidling.
Bjarte Brask Eriksen