På eit møte i Fylkeshuset i Bergen vart kursen for det unike regionale utviklingsprogrammet mellom Vestlandet og tre EU-regionar staka ut. Programmet blir leia av Bertram Harendt i det regionale utviklingsselskapet i Thüringen, Tyskland (midten). Sentrale lokale representantar er Thore Thomassen ved Europakontoret til Hordaland fylkeskommune (t.v.) og Arne Monrad Johnsen ved regional utvikling i Sogn og Fjordane fylkeskommune.
Fjør i hatten
Thore Thomassen ved Europakontoret i Hordaland fylkeskommune, har i samarbeid med Sogn og Fjordane fylkeskommune, teke initiativ til prosjektet.
- Dette er ei fjør i hatten for oss. Det er ein glimrande idé å flytte arbeidet med næringsutvikling ut av kontora til EU til regionane. EU-kommisjonen har altså overlate til regionane sjølve å utvikle felles regionale utviklingsprogram. Dette er eit prøveprosjekt der EU-kommisjonen skal sjå om regionane er i stand til å gjennomføre slike program. Hordaland og Sogn og Fjordane står no i fremste rekkje i Europa for utprøving av desse nye arbeidsmetodane for regionalt utviklingsprogram. Blir dette vellukka, blir dette måten EU skal drive regional utvikling framover, seier Thomassen.
Dele kunnskap
I tillegg til vestlandsregionen er Thüringen i Tyskland og Kaerntan i Austerrike med. I tillegg er Kaunas i Litauen med som observatør. Programmet er retta mot små og mellomstore bedrifter. Når regionar i fleire land er med, er det fordi dei skal dra nytte av samarbeid og kunnskapen dei har og dele med kvarandre. Å byggje nettverk mellom bedriftene blir viktig. Dessutan blir det lagt vekt på overføring av teknologi bedriftene imellom og at nyetablerarar skal få betre tiltak til å komme i gang.
Bli samde om prosjekt
Ramma for prosjektet og samarbeidet er nettopp godkjent av EU.
- No skal regionane bli samde om kva prosjekt pengane skal gå til. Kvart prosjekt må vere eit samarbeid med minst to av dei deltakande regionane. Utfordringa blir å samordne regionale utviklingsprosjekt i Hordaland og Sogn og Fjordane og kople desse inn i samarbeid med dei andre partnarregionane. Vestlandet vil med dette prosjektet ta del i eit særs viktig og lærerikt internasjonalt samarbeid, seier Thore Thomassen.
Visste lite om Vestlandet
På eit møte i Bergen like før påske møtte representantar frå Hordaland og Sogn og Fjordane leiaren av dette utviklingsprogrammet, Bertram Harendt, som er leiar av det regionale utviklingsselskapet i Thüringen i Tyskland, ein region med over to millionar menneske.
- Dette er første gongen eg er i Bergen og på Vestlandet. Eg visste svært lite om regionen før eg kom hit. Tidlegare har eg vore på ferie i Arendal, men det er heilt annleis enn å vere her, seier Harendt.
- Kvifor vil de samarbeide med Vestlandet?
- Det var ikkje vi som valde å samarbeide med Vestlandet, det var Vestlandet som ville samarbeide med oss. Vi skal leie utviklingsprogrammet fordi leiarskapet må vere i eit land som er medlem i EU. Her i Bergen skal vi stake ut kursen vidare. No startar utviklingsprogrammet mellom dei fire regionane som skal gå over to og eit halvt år, seier Bertram Harendt.
Bjarte Brask Eriksen