Hordaland fylkesutval har ingen vesentlege merknader til konsekvensutgreiinga for etablering av steinuttak og tilhøyrande hamneområde ved Raunholmen i Fitjar kommune. Vedtaket vart gjort med 14 mot ei røyst (SV).
Motverke negative konsekvensar
Fylkesutvalet ber om at det vert lagt vekt på å motverke negative konsekvensar for landskap i det vidare arbeidet med konsesjonssøknad og reguleringsplan.
Positive konsekvensar
Fylkesutvalet viser til mål i fylkesplanen om utnytting av steinførekomstar og dei positive konsekvensane for næringsliv og sysselsetjing lokalt som er påvist og tilrår at det blir arbeidd vidare med planane for steinuttak.
Sysselsetjing
I saksutgreiinga vert det vist til at dei positive konsekvensane er knytt til sysselsetjing av 30-50 personar i 30-60 år og verknader for lokalt næringsliv. Dei negative er knytt til landskapsinngrep særleg sett frå skipsleia i Langenuen og vestsida av Tysnes. Inngrepsfrie område vil også bli redusert.
Utsetjing avvist
Magnar Lussand (Sp) føreslo å utsetja handsaminga av saka for å få ho betre utgreidd. Dette vart avvist med tolv mot tre røyster (Sp, SV og V.)
Fråsegn
Vedtaket i fylkesutvalet er ei fråsegn til konsekvensutgreiinga som Bergvesenet har sendt på høyring. Konsesjonssøknad og reguleringsplan vil fylkeskommunen ta stilling til når dei føreligg.
Stanley Hauge