Torsdag 11. september blei Familieverkontoret på Stord offisielt opna av fylkesvaraordførar Torill Selsvold Nyborg. Kontoret skal dekka heile Sunnhordlandsregionen. Hordaland fylkeskommune skal driva kontoret fram til 1. januar 2004. Då tek staten over.
Dagleg leiar av kontoret, Liv Slettmark, omkransa av fylkesvaraordførar Torill Selsvold Nyborg og barneverndirektør Arne Andersen.
Etterlengta
Det var eit etterlengta Familievernkontor som blei opna på Stord. I mange år har kommunane i regionen og fylkespolitikarar arbeidd for å etablera dette tilbodet i Sunnhordland.
I ni år har Fana familievernkontor hatt utedagar på Stord, men no står kontoret i Torggata 10 i Leirvik på eigne bein.
Stor dag
Fylkesvaraordførar Torill Selsvold Nyborg er svært glad for at Familievernkontoret på Stord endeleg er realisert.
- Dette er ein stor dag. I mange år har vi arbeidd for å få etablert dette tilbodet i Sunnhordlandsregionen. Eg er svært glad vi no har fått dette på plass, nokre månader før staten overtek barne- og familievernet. Kontoret her treng meir ressursar og fleire stillingar. Eg har personleg tatt dette opp med barne- og familieminister Laila Dåvøy. Ho har lova å føra stafettpinnen vidare, sa Selsvold Nyborg, då ho offisielt opna kontoret.
Stor pågang
Familieverkontoret på Stord blei tatt i bruk 1. august. Dagleg leiar Liv Slettmark fortel at
pågangen frå publikum har vore stor frå første dag.
- Dette er eit etterlengta kontor, det er openbart at vi var ønska, seier ho.
Nils Marton Aadland