Fylkesutvalet går sterkt i mot forslaget om omfordeling av midlar frå det øvrige riksvegnettet til auka satsing på stamvegnettet. Ei auka satsing på stamvegnettet må koma gjennom auka rammer, heiter det i fylkesutvalet si tilråding til fylkestinget som skal handsama saka 14. oktober.
Fylkesutvalet si tilråding:
1. Fylkestinget ser positivt på at det i forslaget til NTP 2006-2015 vert lagt vekt på styrking av drift og vedlikehald av vegane.
Fylkestinget ser det som svært uheldig og kan ikkje akseptera at råmene til investering vert tilsvarande reduserte.
Fylkestinget går sterkt i mot forslaget om omfordeling av midlar frå det øvrige riksvegnettet til auka satsing på stamvegnettet. Ei auka satsing på stamvegnettet må koma gjennom auka rammer. (Samrøystes.)
2. Fylkestinget kan ikkje akseptere at det i planforslaget ikkje vert opna opp for realisering av bompengeprosjektet Hardangerbrua med statleg delfinansiering i planperioden. Fylkestinget ber om at det i stortingsmeldinga om Nasjonal transportplan 2006-2015 vert opna opp for realisering av Hardangerbrua, som eit aktuelt bompengeprosjekt på stamvegnettet med statleg delfinansiering. (13 mot 2 (SV, V).)
3. Fylkestinget ser det som svært overraskande og uheldig at Vossepakken er utsett og ikkje prioritert i perioden 2006-2009 på stamvegen E16 Sandvika-Bergen. Fylkestinget ber om ei omprioritering der dei statlege midlane til denne bompengepakken hovedsakeleg vert sett av i perioden 2006-2009.
Fylkestinget har merka seg at det i planforslaget ikkje er lagt til rette for oppstart av arbeide med trafikksikringstiltak på E 16 frå Sogn og Fjordane grense via Voss til Bergen. (Samrøystes.)
4. Fylkestinget har merka seg omtalen av den vidare utbygging av E 39 på strekninga Svegatjørn-Rådal mellom Os og Bergen og kan ikkje akseptera at Statens vegvesen ikkje har funne rom for statlege midlar til utbygging før i siste del av tiårsperioden.
Fylkestinget ser utbygginga som eit av dei viktigaste prosjekta på E 39 mellom Bergen og Stavanger. I tillegg til statleg finansiering bør ein vurdera alternative finansieringsløysingar som kan gje oppstart av prosjektet i 2005/06. (Mot 1 røyst (SV).)
5. Fylkestinget ser på prosjektet Rv7 Sokna-Ørgenvika, Buskerud fylke, som eit svært viktig prosjekt for å redusere reisetida mellom Bergen og Oslo, og legg til grunn at det må settast av statlege midlar til prosjektet for oppstart i perioden 2006-2009. (13 mot 2 røyster (SV,V).)
6. Fylkestinget vil peike på E134 over Haukeli som eit viktig aust-vest samband for Sunnhordland/Haugalandet og deler av Hardanger. Fylkestinget ser det difor som svært uheldig at ikkje prosjektet Gvammen-Århus i Telemark fylke er prioritert i planperioden. I tillegg vil fylkestinget understreke behovet for omlegging av tunnelane på strekningen Seljestad, Hordaland fylke til Telemark grense, samt behovet for å vidareføre utbetringsarbeidet på E134 langs Åkrafjorden i Etne kommune. (Samrøystes.)
7. Fylkestinget er svært uroa for utviklinga på Bergensbana både med omsyn til lokaltrafikken og fjerntrafikken med reduserte rammer for investeringstiltak på denne jernbanestrekninga i planforslaget. Fylkestinget krev ei langt større satsing på Bergensbana, og vil for fjerntrafikken særleg understreke behovet for oppstart av Ringeriksbana i perioden 2006-2009.
For lokaltrafikken krev fylkestinget auka rammer for utbetring av stasjonsområdet på Voss, nytt kryssingsspor på Arna stasjon, samt oppstartmidlar for ein eventuell ny togtunnel gjennom Ulriken i perioden 2006-2009. Det må og settast av ytterlegare midlar for satsing på rassikring og sikring av planovergangar på Bergensbana. (Samrøystes.)
8. Fylkestinget går imot planforslaget sitt opplegg for ny hamnestruktur. Fylkestinget vil peike på manglande førersetnader for ein slik hamnestruktur, og vil istaden gjennom ulike virkemiddel og tiltak utvikle eksisterande hamnestruktur med fleire hamneknutepunkt for utanriks godstransport til/frå Vestlandet, der Bergen og omland hamn vert peika ut som intermodal knutepunktshamn. Det må leggast opp til nettverksbygging mellom offentlege og private hamner med fokus på samordning og stordriftsfordeler. (Samrøystes.)
9. Fylkestinget vil ikkje gå inn for å legge til rette for aktiv statleg hamneplanlegging og eigarskap i dei intermodale knutepunkthamnene. Det vil alternativt vere meir aktuelt å utvikle eit opplegg for regional planlegging og eigarskap i desse hamnene. (13 mot 2 røyster (Frp).)
10. Fylkestinget ser positivt på ei støtteordning for oppstart av nye intermodale transport- og logistikkløysingar som eit svært interessant og framtidsretta virkemiddel. Ei slik støtteordning kan vere eit viktig incitament for sjøtransportnæringa til å utvikle nye ruter der riskoen med høge oppstartkostnader vert redusert. (Samrøystes.)
11. Fylkestinget stiller seg positiv til opplegget i planforslaget, der fylkeskommunen skal ha eit større ansvar for utvikling og vedlikehald av det som i dag er kommunale og statlege fiskerihamner. Dette vil kunne inngå i fylkeskommunen sitt samla arbeid med regional utvikling. (13 mot 2 røyster (Frp).)
12. Fylkestinget vil vise til dei lokale tiltak for vegutbetringar på riksvegsamband, som Bømlopakka og Austevollbrua.
Likeeins vil og fylkestinget peika på Stortingets fleirtalsinnstilling om statlege midlar til fylkesvegsambandet Jondalstunnelen, og føreset at desse vert løyvt i samband med statsbudsjettet for 2005. (Samrøystes.)
13. Fylkestinget viser til at Stortinget vedtok nye standardkrav for drift av stamvegferjene i samband med handsaming av Nasjonal transportplan 2002-2011. Rammene for ferjedrifta må difor aukast slik at det er mogleg å innfri eit ferjetilbod på stamvegferjene som er i samsvar med dei aktuelle standardkrava. Innanfor auka rammer må det også leggast opp til ein auke i driftsstandarden på viktige regionale ferjesamband på det øvrige riksvegnettet. (Samrøystes.)
14. Fylkestinget vil understreke behovet for fornying av ferjeflåten, og ser positivt på at det i planforslaget vert lagt opptil 4-5 nye ferjer pr. år i samband med den framtidige konkurranseutsettinga av ferjesamband. Fylkestinget legg til grunn at denne fornyinga av ferjeflåten i hovudsak må føregå gjennom kontrahering av gassdrivne ferjer. (Samrøystes.)
15. Fylkestinget bed om at det på nytt vert vurdert statleg overtaking av Stord lufthamn. Alternativt vil vera årleg økonomisk støtte. (Samrøystes.)
16. Fylkestinget har merka seg omtalen om behova i Bergensregionen (kap. 14.5) når trafikkveksten vert auka i samband med at bompengeinnkrevinga på Askøy og Nordhordlandsbrua vert avvikla om nokre få år.
Fylkestinget har særleg merka seg omtalen av utfordringane av tilkomsthøva mot Askøy og Sotra og føreset at det i planperioden vert lagd fram framlegg til løysingar. I slike planar må kollektivløysingar vere eit sentralt element. (Samrøystes.)
17. Fylkestinget vil særleg peika på trongen for auka rammer i høve til Bergensprogrammet og trongen for nytt fastlandssamband mellom Sotra og Bergen. (14 mot 1 røyst (SV).)
18. Fylkestinget kan ikkje slutta seg til føringane om auka statleg styring av bompengefinansieringa på stamvegnettet og vil leggja til at eit viktig prinsipp at norsk bompengefinansiering ikkje skal fungere som ei generell skattlegging.
Fylkestinget meiner difor at all bompengefinansiering må ha utgangspunkt i lokale og regionale løysingar og finansieringsformer. (Samrøystes.)
Høgre fremja forslag om at det i nasjonal transportplan må opnast for realisering av bompengeprosjektet vegtunnel gjennom Ulriken. Forslaget fekk fem røyster (H, Krf), medan ti røysta imot.
Eit forslag frå Ap, Sp, Krf og V går fylkesutvalet inn for at fylkesordføraren i samarbeid med Statens vegvesen Region vest, skal ta initiativ til ei drøfting mellom Bergen, Os og andre berørte kommunar mellom Bergen og Stord, samt andre interessentar, for å få ei snarleg løysing av Kyststamvegen E 39 mellom dei to storbyområda på Vestlandet. Dette forslaget er tilrådd med 14 mot ei røyst (SV).
Stanley Hauge