Hordaland fylkesutval har ingen merknader til at brua over Langenuen, på den framtidige stamvegen E39 mellom Stord og Bergen, skal få ei seglingshøgd på 62 meter. Mindretalet på to (Frp) ønskte 70 meter av omsyn til framtidig cruisetrafikk.
Tilrådinga frå fylkesutvalet er gjeven i samband med fråsegn til kommunedelplan for E39 gjennom Tysnes. Fylkesutvalet sluttar seg i hovudsak til tilrådingane i kommunedelplanen, men rår frå at strekninga Hodnanes-Reiso skal byggjast med dagline gjennom Uggdalsdalen. På denne strekninga rår utvalet til det såkalla alternativ S1 som går gjennom vestre delar av Tysnes. Ut frå kulturminnefaglege vurderingar tilrår fylkesutvalet Andlavågen som ferjekai i nord.
Magnar Lussand (Sp) føreslo at fylkesutvalet skulle rå til at alternativ S2 med tunnel gjennom Uggdalsfjellet skal veljast som trase for vegen. Forslaget fekk to røyster og fall.
Fremskrittspartiet var samd i at Adlavågen skal vera ferjekai i nord, men Frp kan også akseptera alternativet på Teigland (forslaget fekk Frp sine to røyster).
Stanley Hauge