Dette vil få alvorlege konsekvensar for næringslivet og sysselsetjinga i fylket. Fylkesutvalet føreset at regjeringa etablerer nye regionalt styrte kompensasjonsfond eller nye distriktspolitiske verkemiddel som motverkar verknaden av omlegginga, heiter det i ei fråsegn eit samrøystes fylkesutval har vedteke å senda regjeringa.
EFTA-domstolen har avgjort at den differensierte arbeidsgjevaravgifta i Noreg er ulovleg offentleg støtte og at ordninga må avviklast frå 2004. Noreg har frist til 25. mars i år med å leggja fram eit nytt system for støtte til distrikta.
Frå 1. januar 2000 skjedde det på bakgrunn av EFTA-domstolen si avgjerd endringar av arbeidsgjevaravgifta for ei rekkje næringar. 14 kommunar i landet, av dei heile ni i Hordaland, vart råka av den omlegginga. Arbeidsgjevaravgifta i desse kommunane auka frå 10,6% til toppsatsen 14,1%.
Frå 2004 er kravet at heile den differensierte ordninga skal avviklast. I Hordaland vil det råka desse 14 kommunane: Etne, Tysnes, Kvinnherad, Jondal, Odda, Ullensvang, Eidfjord, Ulvik, Granvin, Kvam, Modalen, Fedje, Masfjorden og Bømlo.
Dei 14 kommunane sine kostnader med arbeidsgjevaravgift vil auka med ca. 51 mill. kr årleg viser utrekningar som Møreforsking har gjort. Privat sektor i desse kommunane vil få 170 mill. kr meir i utgifter til arbeidsgjevaravgifta. Fylkeskommunen si verksemd i desse kommunane vil verta påført auka kostnader med ca. 10 mill. kr.
Stanley Hauge