Statens Vegvesen Hordaland har sendt saka om vegtunnel gjennom Ulriken på høyring for å få innspel til ei konsekvensutgreiing. Tunnelen har fått namnet Arnatunnelen og vil korte inn stamveg E 16 med mellom 14 og 16 kilometer, avhengig av alternativ.
Statens Vegvesen føreslår fire alternative trasear. På bergenssida innkopling på nordre innfartsåre eller på noverande eller ny søndre innfartsåre. På Arnasida er forslaget koplking til hovudkrysset i Indre Arna, alternativ å knytte seg til noverande veg sør for hovudkrysset i Indre Arna, på strekninga mot Espeland nord.
Komite for miljø og samferdsel tilrår at det blir arbeidd vidare med konsekvensutgreiing for vegtunnel mellom Indre Arna og Bergen sentrum med følgjande ni merknader til det framlagde utgreiingsprogrammet:
1. I tillegg til dei fire traséalternativa som er tilrådd vidareført i konsekvensutgreiinga bør det vurderast kva verknader utbygging av Ringveg Aust, Arna-Midttun, til fullgod standard får samanlikna med dei andre alternativa.
2. Det må i konsekvensutgreiinga sytast for at det vert nytta tilsvarande og samanliknbare
trafikkberekningar/trafikkmodellar og tema som i konsekvensutgreiinga for det pågåande
planarbeidet med ei dobbeltspora jernbane gjennom Ulriken.
3. I berekningsgrunnlaget i transportmodellane bør det takast inn eit 4. alternativ, T4, som fangar opp den framtidige overordna rutestrukturen som ligg i Strategi og Handlingsplan for Bergensområdet med 5 minuttar frekvens i rush og 10 minuttar frekvens elles på stamlinjene.
4. Det bør gjennomførast meir omfattande analyser enn det som går fram av meldinga når det gjeld luftforureining i Bergen sentrum.
5. Konsekvensutgreiinga må innehalde forslag til avbøtande tiltak ved eventuelle negative konsekvensar for kulturminner.
6. Konsekvensutgreiinga må fokusera meir på trafikkavvikling og parkering i Bergen sentrum enn det som no ligg i forslaget til konsekvensutgreiing.
7. Konsekvensutgreiinga må vise kva betydning ein vegtunnel vil ha for kollektivandelen og det kollektive rutetilbodet og mellom Arna og Bergen sentrum.
8. Kva konsekvensar vil tiltaket få for krysset på Nygårdstangen, og kva løysingar for krysset vil gi størst handlefridom.
9. Kor stor del av trafikken som passerar Nygårdstangen kan med fordel gå på ringvegsystemet.
Dei seks første punkta vart tilrådd etter forslag frå fylkesrådmannen. Dei tre siste etter forslag frå Arne Jakobsen (A). Alternative forslag frå Stein Inge Ryssdal (på vegner av H, Frp og uavhengige) og Kyrre Stensnes (på vegner av SV og RV, og SV, RV og SP) fall.
Konsekvensutgreiinga av Arnatunnelen skal å kartleggje verknadane av eventuelle tiltak for naturressursar, miljø og samfunn. Følgjande konsekvensar er føreslått tatt inn i utgreiinga:
Prissette konsekvensar:
Tidskostnader for trafikantane, driftskostnader for køyretøya, kostnader ved
ulykker, miljøkostnader, anleggskostnader, drifts- og vedlikehaldskostnader og nytte-/kostnadsanalyse.
Miljøkonsekvensar:
Nærmiljø, kulturminner og kulturmiljø og Landskapsbilde og bybilde
Samfunnsmessige konsekvensar:
Transportkvalitet, kollektivtransport, lokalt utbyggingsmønster,
konsekvensar i anleggsperioden, deponi og overskotsmassar, regionale
verknader.
Bjarte Brask Eriksen