Det er Statens Vegvesen Hordaland som har sendt saka om vegtunnel gjennom Ulriken på høyring for å få innspel til konsekvensutgreiinga. Tunnelen har fått namnet Arnatunnelen og vil korte inn stamveg E 16 med mellom 14 og 16 kilometer, avhengig av alternativ.
Statens Vegvesen føreslår fire alternative trasear. På bergenssida innkopling på nordre innfartsåre eller på noverande eller ny søre innfartsåre. På Arnasida er forslaget kopling til hovudkrysset i Indre Arna, alternativ å knytte seg til noverande veg sør for hovudkrysset i Indre Arna, på strekninga mot Espeland nord.
Hordaland fylkesutval rår til at det blir arbeidd vidare med konsekvensutgreiing for vegtunnel mellom Indre Arna og Bergen sentrum med følgjande ni merknader til det framlagde utgreiingsprogrammet:
1. I tillegg til dei fire traséalternativa som er tilrådd vidareført i konsekvensutgreiinga bør det vurderast kva verknader utbygging av Ringveg Aust, Arna-Midttun, til fullgod standard får samanlikna med dei andre alternativa. (Vedteke mot 1 røyst (Frp).)
2. Det må i konsekvensutgreiinga sytast for at det vert nytta tilsvarande og samanliknbare trafikkberekningar/trafikkmodellar og tema som i konsekvensutgreiinga for det pågåande planarbeidet med ei dobbeltspora jernbane gjennom Ulriken. (Samrøystes vedteke.)
3. I berekningsgrunnlaget i transportmodellane bør det takast inn eit 4. alternativ, T4, som fangar opp den framtidige overordna rutestrukturen som ligg i Strategi og Handlingsplan for Bergensområdet med 5 minuttar frekvens i rush og 10 minuttar frekvens elles på stamlinjene. (Samrøystes vedteke.)
4. Det bør gjennomførast meir omfattande analyser enn det som går fram av meldinga når det gjeld luftforureining i Bergen sentrum. (Samrøystes vedteke.)
5. Konsekvensutgreiinga må innehalde forslag til avbøtande tiltak ved eventuelle negative konsekvensar for kulturminner. (Samrøystes vedteke.)
6. Konsekvensutgreiinga må fokusera meir på trafikkavvikling og parkering i Bergen sentrum enn det som no ligg i forslaget til konsekvensutgreiing. (Vedteke med 10 mot 5 røyster (H, Frp., uavh.).)
7. Konsekvensutgreiinga må vise kva betydning ein vegtunnel vil ha for kollektivandelen og det kollektive rutetilbodet og mellom Arna og Bergen sentrum. (Vedteke med 10 mot 5 røyster (H, Frp., uavh.).)
8. Kva konsekvensar vil tiltaket få for krysset på Nygårdstangen, og kva løysingar for krysset vil gi størst handlefridom. (Vedteke med 10 mot 5 røyster (H, Frp., uavh.).)
9. Kor stor del av trafikken som passerar Nygårdstangen kan med fordel gå på ringvegsystemet. (Vedteke med 10 mot 5 røyster (H, Frp., uavh.).)
Alternative forslag frå Tom-Christer Nilsen (på vegner av H, Frp og uavhengige) og Gerti Kolstad (SV) fall.
Konsekvensutgreiinga av Arnatunnelen skal å kartleggje verknadane av eventuelle tiltak for naturressursar, miljø og samfunn. Følgjande konsekvensar er føreslått tatt inn i utgreiinga:
Prissette konsekvensar:
Tidskostnader for trafikantane, driftskostnader for køyretøya, kostnader ved ulykker, miljøkostnader, anleggskostnader, drifts- og vedlikehaldskostnader og nytte-/kostnadsanalyse.
Miljøkonsekvensar:
Nærmiljø, kulturminner og kulturmiljø og Landskapsbilde og bybilde
Samfunnsmessige konsekvensar:
Transportkvalitet, kollektivtransport, lokalt utbyggingsmønster, konsekvensar i anleggsperioden, deponi og overskotsmassar, regionale verknader.
Stanley Hauge