Fylkestinget vedtok 21. mars 2000 at det skulle utarbeidast ny museumsplan for Hordaland. Eldre planar treng fornying, men den nye planen vil framfor alt vera Hordaland fylke sitt svar på stortingsmeldinga om museum: St.meld. 22 (1999-2000) Kjelder til kunnskap og oppleving. Om arkiv, bibliotek og museum i ei IKT-tid og om bygningsmessige rammevilkår på kulturområdet (ABM-meldinga). Reforma har mellom anna som mål å gjera musea til sterkare og meir levedyktige institusjonar og er retningsgjevande for eit meir formalisert samarbeid mellom arkiva, biblioteka og musea som kunnskapsinstitusjonar. Museumsfeltet vil utgjera ein endå viktigare del av den fylkeskommunale kulturpolitikken, og det vert tilrådd at den nye museumsplanen får status som fylkesdelplan.
Det nye høyringsutkastet er bearbeidd i høve til vedtaket i komité for kultur og helse 18. juni 2002.
Det vert no gjort framlegg om 7 konsoliderte museumseiningar:
1. ”Bergen Bymuseum” samansett av Gamle Bergen Museum, Bryggens Museum med Rosenkrantztårnet og Håkonshallen, Bergen Skolemuseum, St. Jørgen/lepramuseet, Damsgård Hovedgård, Alvøen Hovedbygning og samlinga til Bergen Brannmuseum.
2. ”Bergen kunstmuseum”/Hordaland kunstmuseum samansett av Bergen Kunstmuseum, Vestlandske kunstindustrimuseum, Edvard Grieg Museum/Troldhaugen, Museet Siljustøl og Museet Lysøen.
3. ”Hordaland kystmuseum” samansett av Det Hanseatiske Museum, Norges Fiskerimuseum, Bergens Sjøfartsmuseum, Kystmuseet i Øygarden, Nordsjøfartsmuseet og Herdla museum.
4. ”Regionmuseum for indre Midthordland” samansett av Hordamuseet, Osterøy Museum og Voss folkemuseum
5. ”Sunnhordland regionmuseum” samansett av Sunnhordland Folkemuseum og Baroniet i Rosendal
6. ”Hardanger regionmuseum” samansett av Hardanger folkemuseum, Ingebrikt Vik Museet, Kvam Bygdetun, Stiftinga Agatunet og Norsk Vasskraft- og Industristadmuseum.
7. ”Museumssenteret i Salhus”/”Nordhordland regionmuseum” samansett av Regionmuseet for Nordhordland, Norsk Trikotasjemuseum og Tekstilsenter og Fellestenestene for musea i Hordaland.
Det er teke utgangspunkt i geografiske modellar, men det einskilde konsoliderte museet vil utvikla og tilby spesialkompetanse på ulike felt som naturleg høyrer heime i regionen.
Det er naudsynt å henta inn offentlege fråsegner frå fagmiljøa, kommunane og brukarane som grunnlag for ny bearbeiding før planen går til endeleg godkjenning i fylkestinget og Miljøverndepartementet. Komité for kultur og helse rår difor til at museumsplanen vert send på offentleg høyring med ein høyringsfrist på to månadar.
Eit tilleggsforslag frå Terje Olav Hermansen (A) om at komitéen særleg peikar på at tal på konsoliderte museumseiningar ikkje er endeleg fastlagt vart vedteke mot 5 røyster (H, Frp/U).
Saka skal opp i fylkesutvalet 10. oktober.
Les heile pressemeldinga frå komite for kultur og helse
Eli Lothe