Fylkesvaraordførar Torill Selsvold Nyborg reagerer svært sterkt på at 16 menn og ingen kvinner blei funne verdig til styret i Sunnhordland Kraftlag, SKL. - Dette er direkte uhøyrt og kan definitivt ikkje godtakast, seier ho.
Måndag var representantar frå kraftbransjen i Sunnhordland samla til generalforsamling i SKL. Då valet på medlemer og varemedlemer til styret skulle gjerast, blei det forslått 16 menn og ingen kvinner til desse verva. Alle dei 16 mennene blei valde.
- Eg er forundra over at noko slikt kan skje i år 2002. Det skal vere 40 prosent kvinner i alle offentlege styre og råd. Hordaland fylkeskommune legg stor vekt på å oppfylla dette kravet. Det var også årsaka til at Hordaland fylkeskommune sin representant på generalforsamlinga i SKL, Hans Otto Robberstad, påpeika den grove skeivheita. Eg vil ikkje slå meg til ro med det som har skjedd. Personleg er eg overtydd om at det finst mange dyktige kvinner i Sunnhordland som kan tilføra styret i SKL mykje kunnskap og kompetanse. Eg vil ta opp denne saka med likestillingsministeren og Likestillingsombodet med sikte på å få vurdert valet på styre ut frå gjeldande lovverk, seier fylkesvaraordførar Torill Selsvold Nyborg.
Nils Marton Aadland