Sentra i Hordaland skal styrkjast gjennom utvikling av kjøpesenter og redusert transportbehov med bil. Straume og Osøyro skal få status som nye regionsenter. Hordaland fylkeskommune sender no "kjøpesenterplanen" ut på høyring.
”Fylkesdelplan for senterstruktur og lokalisering av service og handel” er sendt ut på brei høyring til kommunar, sentrale regionale statsetatar, næringslivsorganisasjonar, handelsnæringa og til brukargrupper. Frist for å gje svar er 1. oktober 2002. Endeleg handsaming av planen skal skje på fylkestinget i Bergen 15.-17. oktober 2002.
Etableringsstopp
Denne fylkesdelplanen er ei oppfølging av at regjeringa vedtok mellombels etableringsstopp av kjøpesenter utanfor sentrale delar av byar og tettstader. Etableringsstoppen tok til å gjelde 1. februar 1999 og skal gjelde i fem år eller til fylkeskommunen har godkjent ”kjøpesenterplan”.
Robust og berekraftig
Hordaland fylkeskommune ønskjer med ”kjøpesenterplanen” å oppnå ei meir berekraftig og robust by- og tettstadutvikling. ”Kjøpesenterplanen” skal avløyse den mellombelse etableringsstoppen og vere retningsgjevande for kommunal planlegging.
Målet er å styrkje eksisterande by- og tettstadsenter, unngå utvikling som fører til byspreiing og hindre at ein blir meir avhengig av bil og får dårlegare tilgjenge for dei som ikkje disponerer bil.
Ny regionsenter
I forslaget til plan er det framlegg om at Straume i Fjell kommune og Osøyro i Os kommune blir regionsenter. Desse kommunane har tilsvarande service og handelstilbod som dei andre regionstadene i Hordaland og er også viktige knutepunkt.
Meir informasjon og høyringsframlegg
Bjarte Brask Eriksen