Arbeidet med å merke Nordsjøløypa blir intensivert i år. Hordaland fylkeskommune bidreg med 300.000 kroner til merking. Det same gjer kommunane langs kysten.
Prosjektleiar Aud Karin Skagen ved Kulturlandskapssenteret i Hordaland fylkeskommune er svært glad for arbeidet som no blir gjort. På biletet avdukar ho løypa som går frå Glesvær til Telavåg
- Dette er første året vi får direkte midlar til arbeidet med Nordsjøløypa. Eg reknar med vi skal kome langt i år. Dei løyvde pengane blir brukt til å lage merka som skal stå langs løypa. Arbeidet med å setje opp merka blir gjort på dugnad i sommar med god hjelp av bygdelag, bygdefolk, turlag, jakt- og fiskelag, skular og nærmiljøutval. I september skal vi ha oppsummering over det vi har fått gjort, seier Skagen.
Oppdagingsferd
Nordsjøløypa er alle dei gamle ferdselsvegane som ligg rundt Nordsjøen. Visjonen for Nordsjøløypa er å binde saman fortid, notid og framtid. Å vandre langs nordsjøløypa er ei oppdagingsferd på attgrodde stiar, opne markar, fjelltoppar og sjøstrekningar. I tillegg skal Nordsjøløypa blåse nytt liv i den gamle kystkulturen. Gamle handels- og gjestgjevarstader blir tekne i bruk igjen til å ta imot farande langs kysten.
Fedje ferdig
Alle ni kommunar langs kysten i Hordaland er med i Nordsjøløypeprosjektet. Fedje er komen lengst og er ferdig med å merke to løyper i kommunen. Sju andre kystkommunane har planar om å merke i sommar. Enkelte er komne lengre enn andre. Øygarden, Austevoll, Fitjar og Stord har tidlegare merka ein del løyper. I Sund, Fjell, Sveio, Bømlo og Øygarden står bygdefolk klare til å merke i sommar.
Bjarte Brask Eriksen