Komiteen peikar på at staten ikkje har gitt Hordaland fylkeskommune full kompensasjon for sjukehusreforma, og fylkeskommunen slit difor med stor lånegjeld. Dette går no utover undervisningsbudsjettet og elevane i Hordaland med eit dårlegare skuletilbod i åra framover.
To millionar til vaksenopplæring
Men sjølv om komiteen går inn for store nedskjeringar, vil den ikkje røre vaksenopplæringa og går inn for å overføre to millionar kroner frå idrettshallen i Sund. Dei fylkeskommunale to-millionane til idrettshallen blir i staden tilrådd utbetalt i 2004.
Komiteen ønskjer heller ikkje å skjere ned på stillinga som husflidskonsulent, som er ein svært viktig funksjon for husflidsnæringa og reiselivet og vil løyve 75.000 kroner til den.
Med bakgrunn i elevtalsauken og målsetjinga om eit betre skuletilbod, treng den vidaregåande skulen i Hordaland auka rammer i åra framover for å behalda eit desentralisert skuletilbod, og eit tilbod om best mogeleg kvalitet til alle elevane våre.
Konsekvensen dersom undervisningsbudsjettet ikkje får tildelt meir midlar i budsjett/økonomiplan, kan bli så dramatisk at ein sentral byskule vert vurdert nedlagt for å utnytta kapasiteten i distriktsskulane i staden.
Dette vart tilrådd av A, KrF, V og SP. Dei fem frå H, Frp og ei frå SV røysta imot.
Mangel på elevplassar
Komiteen gjer følgjande oppsummering over kva konsekvensane nedskjeringane kan få for elevane:
- Eit redusert desentralisert skuletilbod
- Høgare skyssutgifter, og fleire som må bu borte frå heimen.
- Med nedskjering av klassetalet kan det bli mangel på elevplassar i vekstområda i åra framover. (Hordaland har ein elevtalsauke på om lag 3700 elevar fram til 2008).
- Ei dreiing frå yrkesfag til allmennfag vil ramma det yrkesretta næringslivet.
- Den lovpålagde vaksenopplæringa vert redusert i strid med realkompetansereforma.
Saka går vidare til fylkesutval og fylkesting.
Les heile pressemeldinga frå komiteen
Bjarte Brask Eriksen