Hordaland fylkesutval har løyvd 250 000 koner til det toårige prosjektet ”Rådgjeving i spørsmål om havbruk og kystsoneplanlegging” (KYSTRÅD). Vedtaket vart gjort med 14 mot ei røyst (Frp).
Den overordna målsetjinga med prosjektet er å utvikla havbruksfylket Hordaland. Næringa har i mange samanhengar framheva tilgang til areal og ei kystsoneforvalting med pålitelege rammevilkår som ein sentral føresetnad for ei betre utnytting av eksisterande konsesjonar for laks/aure.
Prosjektet sitt mål er å styrkja planleggingskompetansen i kommunane via betre og meir koordinert rådgjeving på regionalt nivå. Konkret skal dei regionale etatane gå saman for å gje betre råd til 6-7 utvalde kommunar i to regionar, som ynskjer innspel tidleg i planprosessen. Dette skal resultera i utarbeiding av generelle rutinar for korleis etatane kan yta konstruktiv støtte i planarbeidet og såleis redusera omfanget av klagar og konfliktar i høve til planar og enkeltsaker i ettertid. Vidare vil det skje kompetansehevingstiltak i alle kommunane.
Prosjektet er ei oppfølging av handlingsdelen i fylkesdelplanen for kystsona. Prosjektet vert gjennomført som eit prosjekt i strategisk næringsplan (SNP) innan satsingsområdet marin sektor. Samla budsjett er på ca. 1,1 mill. kr fordelt over to år.
Stanley Hauge