På biletet ser vi fylkesordførar Gisle Handeland med plaketten han overrekte til barneverndirektør Arne Andersen (sitjande) og leiar av ungdomsbasen, Eirin Baugstø.
Representantar frå både kommune, fylke og stat deltok i opningsfesten. Og alle hadde berre godord å kome med om dette tiltaket i grenselandet mellom fylkeskommune og kommune.
Godt samarbeid
- Ungdomsbasen er eit døme på godt samarbeid mellom kommune og fylkeskommune. Den er ein buffer mot opphald i institusjon, sa Erik Lussand på vegner av fylkesmannen og den regionale stat.
- Hordaland fylkeskommune har vore framtidsorientert. Ungdomsbasen er eit svært godt tiltak for barn, ungdom og familiar i Fyllingsdalen, sa avdelingsdirektør Bjørn Bredesen i Sosialdepartementet.
- Hald fram med å ta vare på ungdommen. Stå på! sa bydelsleiar i Laksevåg, Bente Krokeide.
Ungdomsbasen har fått betre plass, fleire kontor og meir armslag i det nye huset i Vestlundvegen som er på 376 kvadratmeter mot 300 i det gamle i Klauvsteinen. Huset har kosta om lag 6,65 millionar kroner.
Familiar og ungdom
15 tilsette arbeider ved ungdomsbasen som er eitt av tiltaka innan barne- og familievernet i Hordaland. Ungdomsbasen arbeider med familiar og ungdom i Fyllingsdalen og gamle Laksevåg bydel som er komne inn i ei negativ utvikling med konfliktar i familien, på skulen/arbeid eller i fritida.
Baugstø er glad for at dei no har fått eigne møterom for foreldresamtalar og nettverksmøte, noko som er viktig i det arbeidet dei gjer. Dessutan har dei fått fleire kontor, slik at no deler tre tilsette eitt kontor mot seks tidlegare.
Krise i heimen
Ungdomsbasen har to team. Det eine driv ei bueining i huset der ungdom kan bu i ein kort periode når det er krise i heimen. Det andre teamet driv utadretta arbeid i heimen og nærmiljøet til ungdommen. Poenget er å løyse krisa der ungdommen bur og førebyggje mot at det blir behov for opphald i institusjon. Ungdomsbasen har kapasitet til å ta seg av 40-50 familiar i året.
Ungdomsbasen driv kontinuerleg utviklingsarbeid gjennom prosjekt. Fire aktuelle prosjekt er nettverksmetodikk, utvikling av heime-hos-metodikk og livsfaseorientert personalpolitikk. Det siste prosjektet er å få eiga heimeside på internett.
Bjarte Brask Eriksen