I tillegg vert fylkesrevisjonen beden om å gjennomgå rekneskapsutviklinga knytt til utstyr og vedlikehald/ombyggingsarbeid ved sjukehuset. Fylkestinget ber om at dette arbeidet vert gjennomført så raskt om mogleg og fylkesutvalet får fullmakt til å gjera nye vedtak og evt. oppheva innkjøpsstoppen etter at rapporten ligg føre.
Sterk forverring
Rekneskapsprognosen etter 2. tertial 2001 viser ei sterk forverring av rekneskapssituasjonen - frå 275 mill. kr til 339 mill. kr. Hovudårsaka til forverringa er at KLP har meldt i frå om at dei i år vil krevje inn ekstrapremie på 104 mill. kr.
I tillegg til forverringa som skuldast ekstrarekninga frå KLP er det særleg forverringa av prognosen for Haukeland sykehus som peikar seg ut.
Rekneskapsprognosen for barne- og familievernet aukar med 17 mill. kr til heile 94 mill. kr, men denne siste auken har i stor grad samanheng med rekneskapstekniske forhold.
Siste utvikling
Fylkesrådmannen er særleg kritisk til den siste utviklinga på Haukeland sykehus. Sjukehuset sin underskotsprognose aukar med 45 mill. kr frå 1. til 2. tertial. Haukeland sykehus gjer i sine kommentarar til rekneskapsprognosen greie for at 10 mill. kr av forverringa på 45 mill. kr skuldast auka utgifter på hovudpost 1, Utstyr og vedlikehald.
Fylkesrådmannen er kritisk til desse nye store overskridingane på postar som det tradisjonelt er fullt mogeleg å styre innanfor budsjettrammene. I ein situasjon med store overskridingar er det sjølvsagt ikkje akseptabelt at sjukehuset pådreg seg nye store overskridingar på slike postar, skriv fylkesrådmannen i sine kommentarar.
Framlegg som fall
Tom-Christer Nilsen fremja på vegner av Høgre tilleggsframlegg. Dette framlegget gjekk mellom anna ut på følgjande:
* Alle investeringsprosjekt eller delprosjekt ved sjukehusa som ikkje er sette i gang, vert utsett fram til 1.1.01.
* Alle deler av igangsette prosjekt skal stansast det er naturleg. Det skal ikkje gjerast investeringar i sjukehussektoren fram til 1.1.02, som ikkje er høgst nødvendige for å halda drifta i gang. Dette gjeld spesielt prosjekteringskostnader for prosjekt som ikkje skal gjennomførast etter 1.1.02.
* Alle tilskotskontoar i fylkeskommunen som enno ikkje er utbetalt, og som ikkje er omfatta av juridisk bindande avtalar om utbetaling, skal ikkje utbetalast. I tillegg skal ”ymse-kontoar” verta sperra for ytterlegare bruk.
* Det skal innførast stillingsstopp for heile verksemda, og det skal leggjast fram ein rapport om korleis nedbemanninga i administrasjonen i samband med sjukehusreforma skal gjennomførast.
Tilleggsframlegget frå Tom-Christer Nilsen fekk 24 røyster (H, Frp og uavhengig), og fall. Høgre føreslo også at det straks skal setjast i gang arbeid med å selja eigedomar som ikkje naturleg høyrer til sjukehus ved overgangen til staden, som t.d. personalbustader, kjøkken, vaskeri osb. Dette forslaget fekk 25 røyster (H, Frp, uavh. og pensj.) og fall.
Bjørn Lothe (SV) fremja følgjande tilleggsframlegg:
Fylkestinget føreset at innkjøpsstoppen ikkje går ut over pasientbehandlinga.
Dette framlegget fekk 32 røyster (H, Frp, SV, RV, pensj. og uavh.), og fall.
Stanley Hauge