Staten må ikkje svekka ordninga med landslinjer i dei vidaregåande skulane og Stortinget må syta for å sikra dei økonomiske vilkåra for slike linjer, krev Hordaland fylkesting.
Etter forslag frå Mette Holmefjord Olsen (Sosialistisk venstreparti) vedtok fylkestinget samrøystes denne fråsegna:
"Nei til svekking av landsliner i vidaregåande opplæring
Hordaland fylkesting ber Stortinget på ny slå ring rundt kostnadskrevjande landsdekkande tilbod i vidaregåande opplæring.
Ulike bransjar som t.d. transport og anleggsbransjen treng godt kvalifiserte utøvarar, og desse opplæringstilboda står i fare for nedlegging dersom fylka skal kosta desse sjølve utan særlege løyvingar frå staten.
Hordaland fylkesting er negativ til at KUF på ny ønskjer å svekka landslinene. Stortinget må sikra dei økonomiske vilkåra for desse tilboda gjennom budsjettarbeid sitt i haust."
Stanley Hauge