Idrettskonferansen for Hordaland, som vart skipa til 16.-17. november, vedtok å senda ei fråsegn til Stortinget og regjeringa. I fråsegna vert dei sentrale styresmaktene oppfordra til å setja idretts- og friluftspolitikk høgt på dagsorden.
Fråsegna lyder:
”Til Stortinget/Regjeringa
Fylkeskonferansen i Hordaland 2001 – idrett, fysisk aktivitet og friluftsliv vil utfordre Regjeringa og Stortinget til å setje sentrale idretts- og friluftspolitiske emne høgt på den politiske dagsorden. Vi treng ein nasjonal debatt om kva rolle idretten skal ha som ein integrert del av samfunnet. I ein slik debatt må fokus flyttast frå idrett som internasjonal mediestyrt verksemd til idrett og friluftsliv som lokale aktivitetar, - integrert i nærmiljøet.
Fylkeskonferansen i Hordaland 2001 utfordrar styresmaktene til å klårgjere aktuelle idrettspolitiske mål og verkemidlar i eit breitt samfunnsperspektiv. Korleis kan samfunnet flytte ressursar frå reparasjon til førebygging? Korleis kan vi gjennom idrettspolitiske verkemidlar demme opp for auka helse- og sosialutgifter?
Dei spørsmål som er stilte her, er direkte og indirekte handsama i ei rekkje offentlege utgreiingar og meldingar. Utfordringa i forlenginga av dette, er å samle dei mange fragmenta i ein heilskapleg politikk og utforme politikken i eit konkret handlingsprogram.
Hordaland fylkeskommune
Oddvar Jensen (s)
Leiar i Komité for kultur og helse
Hordaland Idrettskrets
Hans O. Aaserud (s)
leiar”
Stanley Hauge