Det nye tilbygget ved Fylkessjukehuset på Stord er snart klar for innflytting. Det har kosta 116 millionar kroner og er på 3.500 kvadratmeter. Offisiell opning skjer onsdag 5. desember.
Det nye huset blir gradvis teke i bruk. Fredag 16. november flytter fødeavdelinga inn i nye lokale. Den nye poliklinikken blir teken i bruk måndag 26. november, og 10. desember kjem den nye operasjonsavdelinga i drift.
Markering
Overleveringa av nybygget frå Hordaland fylkeskommune til Fylkessjukehuset på Stord blir markert onsdag 5. desember. Bygningen har tre brukshøgder.
Fødeavdelinga er på grunnplanet, poliklinikkar i første høgde og operasjonsavdeling i øvste høgd.
Samstundes med byggearbeidet er det gjort ei omfattande oppgardering av varmesentralen i sjukehuset. No gjenstår ei vesentleg ombygging av ”gamlebygningen” før heile prosjektet med oppgradering av sjukehuset blir sluttført neste haust.
650 nyfødde kvart år
Det har kosta 104 millionar kroner å bygge huset. I tillegg er det investert 12 millionar kroner i nytt utstyr.
Den nye fødeavdelinga har to fødestover og 11 sengerom med 17 senger. Det blir fødd 650 barn på sjukehuset kvart år. Tysdag 13. november er det open dag mellom klokka 11.00 og 15.00 for alle som ønskjer å sjå den nye fødeavdelinga.
Den nye poliklinikken har 14 behandlingsrom med nytt, moderne utstyr. Der blir det open dag måndag 19. november.
Den nye operasjonsavdelinga får topp utstyrte operasjonsstover. Her blir det open dag med omvising onsdag 5. desember.
Resepsjonen i hovudinngangen er nyoppussa og nyinnreidd og vil bli gjenopna fredag 16. november.
Bjarte Brask Eriksen